medium

large

thumbnail

1536x1536

2048x2048

small

custom-size

Gleðilegt sumar!

Grásleppusjómenn fagna lengingu veiðitímabilsins – myndasyrpa

Hlynur Blær gefur bílum nýjan blæ

Brúin komin á sinn stað yfir Berjadalsá

ÞB Borg reisir glæsihýsi í Stykkishólmi

Brást illa við afskiptum lögreglu

core/freeform

Leirbakaríið Suðurgötu 50a var opnað formlega síðastliðinn föstudag. Húsnæðið var áður þekkt sem Brauða- og kökugerðin en þar var rekið bakarí frá 1967 og fram á þetta ár. „Við komum til með að „baka“ leir, þó við um það bil 1000° hærra hitastig en bakstur Brauða- og kökugerðarinnar. Það kom aldrei neitt annað nafn til greina,“ segir Kolbrún Sigurðardóttir myndlistarkona og kennari um tilurð nafnsins í samtali við Skessuhorn.

Leirbakaríið er rekið af listakonunum og kennurunum Kolbrúnu Sigurðardóttur (KolSi) og Maríu Kristínu Óskarsdóttur (Maju Stínu). Báðar eru menntaðar í leirlist, Maja Stína frá Danmörku og KolSi frá Myndlista- og handíðaskóla Íslands og er með meistaragráðu í faginu frá Ungverjalandi, auk þess sem þær eru menntaðar sem kennarar. Leiðir þeirra lágu fyrst saman árið 2009, þegar þær ásamt fleiri leirlistamönnum stofnuðu galleríið Kaolin í Reykjavík.

„Húsnæðið hentaði okkur sérlega vel og við tókum nokkrar vikur í að aðlaga það að okkar starfsemi. Sjarmi húsnæðisins fyrir okkur fólst ekki síst í stóra háfnum sem var yfir ofninum og stóru vöskunum sem fengu að halda sér,“ segir Kolbrún. Þær hafi endurnýtt ýmislegt við endurhönnun húsnæðisins en líka hannað það með vissan tilgang í huga. „Við hönnuðum rýmið fyrir verkstæðið með það í huga að geta boðið upp á fjölbreytt námskeið bæði fyrir börn og fullorðna.“ Auk þess hafa Maja Stína og KolSi hvor sitt vinnurýmið.

Maja Stína hefur aðallega unnið nytjahluti, hennar vinnsluefni er oftast postulín. Hún rennir flest sín verk á rennibekk, svo sem skálar, kertastjaka, diska og bolla þar sem hver og einn bolli hefur sinn karakter. KolSi vinnur jöfnum höndum í leir og málar. Hún segir að í leirverkunum dansi hún gjarnan á línunni á milli nytjalistar og skúlptúrs og að málverkin einkennist af glaðværð, leik, ævintýraþrá og frelsi þar sem íslensk náttúra, húmor og daglegt líf séu oftar en ekki viðfangsefnið.

Frá og með 19. desember verður opið í Leirbakaríinu fyrir gesti og gangandi frá kl. 15:00-21:00. Á Þorláksmessu verður opið frá 17:00-21:00. „Þar fyrir utan má alltaf kíkja við og ganga í bæinn ef við erum á staðnum að vinna,“ segir Kolbrún.

Leirbakarí opnað á Akranesi