Skallagrímur og Valur áttust við í Domino‘s deild karla í körfuknattleik í gærkvöldi. Leikið var í Borgarnesi og var góð stemning á pöllunum að vanda. Leikurinn var jafn og spennandi en í lokafjórðungnum sigu gestirnir fram úr og tryggðu sér að lokum níu stiga sigur, 96-105.

Leikurinn hófst á mikilli þriggja stiga skotsýningu beggja liða, sem hittu þó misvel. Leikurinn var hraður og líflegur, Skallagrímsmenn höfðu heldur yfirhöndina framan af en Valsmenn áttu lokaorðið í fyrsta leikhluta og leiddu með einu stigi að honum loknum, 21-22. Gestirnir byrjuðu betur í öðrum fjórðungi en heimamenn náðu að vinna sig inn í leikinn aftur og aðeins munaði tveimur stigum í hléinu. Valur leiddi, 48-50.

Skallagrímsmenn mættu ákveðnir til síðari hálfleiks og jöfnuðu metin. Liðin fylgdust að næstu mínúturnar þar til Valur náði yfirhöndinni á ný og leiddi með fimm stigum fyrir lokafjórðunginn, 71-76. Í fjórða leikhluta náði Valur að slíta sig aðeins frá Skallagrími. Gestirnir komust þrettán stigum yfir snemma í leikhlutanum og lögðu þar grunn að sigrinum. Borgnesingar náðu ekki að koma til baka og lokatölur urðu 96-105, Valsmönnum í vil.

Aundre Jackson var atkvæðamestur í liði Skallagríms með 28 stig og tíu fráköst. Domagoj Samac skoraði 24 stig og tók fimm fráköst og Bjarni Guðmann Jónsson var með 17 stig og sjö fráköst.

Kendall Lamont Anthony átti stórleik fyrir Val og var að öðrum ólöstuðum besti maður vallarins. Hann skoraði 48 stig, tók fimm fráköst og gaf sjö stoðsendingar. Aleks Simeonov skoraði 13 stig og tók tólf fráköst og þeir Benedikt Gröndal og Austin Magnús Bracey skoruðu ellefu stig hvor.

Skallagrímur situr í ellefta sæti deildarinnar með fjögur stig eftir níu leiki, tveimur stigum á undan botnliði Breiðabliks en tveimur stigum á eftir næstu liðum fyrir ofan. Næsti andstæðingur Skallagríms er topplið Tindastóls. Liðin mætast norður á Sauðárkróki fimmtudaginn 13. desember næstkomandi.

Misstu gestina fram úr sér á lokasprettinum