Snæfell mátti játa sig sigrað gegn Vestra,72-91, í fjörgum leik í 1. deild karla í körfuknattleik. Leikið var í Stykkishólmi í gærkvöldi.

Strax í upphafi leiks mátti sjá mikil batamerki á liði Snæfells frá fyrri leikjum tímabilsins. Allt önnur og betri holning er á liðinu eftir að Deandre Mason var látinn taka pokann sinn í síðustu viku. Ungir og upprennandi leikmenn Snæfells léku vel gegn sterku liði Vestra, létu boltann ganga vel og gáfu ekkert eftir. Gestirnir leiddu með sex stigum eftir fyrsta leikhluta, 19-25. Vestri náði góðum kafla snemma í öðrum leikhluta og þar með því að slíta sig frá Snæfelli. Gestirnir höfðu 14 stiga forystu í hléinu, 34-48.

Snæfellingar mættu ákveðnir til síðari hálfleiks og minnkuðu muninn í sex stig snemma í þriðja leikhluta. Þeir gáfu gestunum ekkert eftir og fylgdu þeim eins og skugginn næstu mínúturnar. Seint í leikhlutanum náði Vestri góðum spretti og 16 stiga forskoti fyrir lokafjórðunginn, 55-71. Þeir gættu þess að gefa spræku liði Snæfells aldrei færi á sér það sem eftir lifði leik. Vestramenn bættu lítið eitt við forystuna og sigruðu að lokum með 91 stigi gegn 72.

Rúnar Þór Ragnarsson var stigahæstur í liði Snæfells með 14 stig og sex fráköst að auki. Ísak Örn Baldursson skoraði 13 stig og Aron Ingi Hinriksson ellefu.

Nebosja Knazevic var atkvæðamestur í liði Vestra með 21 stig, fimm fráköst og sex stoðsendingar. Nemanja Knazevic skoraði 20 stig og tók tíu fráköst, Andre Huges skoraði 19 stig og tók 12 fráköst og Gunnlaugur Gunnlaugsson var með tíu stig.

Snæfell situr á botni deildarinnar og er enn á sigurs eftir átta leiki, tveimur stigum á eftir Sindra í sætinu fyrir ofan. Næst leikur Snæfell fimmtudaginn 6. desember, þegar liðið mætir Hetti á Egilsstöðum.

Snæfellingar töpuðu í fjörugum leik