Þjálfaralausar Skallagrímskonur töpuðu naumlega gegn Keflavík, 83-89, þegar liðin mættust í tíundu umferð Domino‘s deildar kvenna í körfunattleik. Leikið var í Borgarnesi í gærkvöldi.

Skallagrímskonur mættu mjög ákveðnar til leiks og komust tíu stigum yfir með góðum spretti undir lok fyrsta leikhluta, 29-19. Þær héldu um það bil sama forskoti framan af öðrum fjórðungi. En Keflavík náði góðri rispu undir lok fyrri hálfleiks og minnkað forskot Skallagríms í fjögur stig áður en hálfleikslfautan gall, 48-44.

Mikið jafnræði var með liðunum eftir hléið en Skallagrímskonur voru þó feti framar. Þær leiddu með sjö stigum fyrir lokafjórðunginn, 68-61. Algjör viðsnúningur varð á leiknum í fjórða leikhluta. Skallagrímskonur leiddu með fimm stigum þegar fimm mínútur lifðu leiks. Þá náði Keflavík góðri rispu, skoraði átta stig í röð og komst yfir. Frábær lokasprettur Keflavíkurkvenna hélt áfram og með honum náðu þær að stela sigrinum í lok leiks. Lokatölur urðu 83-89, gestunum í vil.

Shequila Joseph var atkvæðamest í liði Skallagríms. Hún setti upp tröllatvennu með 25 stig og 21 frákast og gaf fimm stoðsendingar að auki. Maja Michalska skoraði 20 stig og gaf fimm stoðsendingar, Bryesha Blair var með 15 stig og fimm stoðsendingar og Ines Kerin skoraði ellefu stig.

Bryttani Dinkins átti stórleik í liði gestanna, skoraði 38 stig, tók níu fráköst og gaf tíu stoðsendingar. Bryndís Guðmundsdóttir var með 15 stig og ellefu fráköst og Katla Rún Garðarsdóttir skoraði tíu stig.

Skallagrímur hefur sex stig í sjötta sæti deildarinnar, tveimur stigum á eftir Val en með jafn mörg stig og Haukar í sætinu fyrir neðan. Næst leika Skallagrímskonur á laugardaginn, 8. desember, þegar þær mæta Stjörnunni á útivelli.

Skallagrímskonur misstu af sigrinum