Skallagrímskonur urðu að játa sig sigraðar Breiðabliki í níundu umferð Domino‘s deildar kvenna á laugardagskvöld. Leikið var í Kópavogi og lokatölur urðu 85-79, þar sem Breiðabliki tókst að stela sigrinum á lokamínútunum eftir að Skallagrímur hafði leitt nánast frá upphafi. Var þetta fyrsti sigur Kópavogsliðsins í deildinni í vetur.

Breiðablik skoraði fyrstu stigin en Skallagrímskonur voru mun sterkari í fyrsta leikhluta og leiddu með tíu stigum að honum loknum, 18-28. Þær héldu Blikum í svipaðri fjarlægð stærstan hluta annars leikhluta, en tóku síðan góða rispu undir lok fyrri hálfleiks og höfðu gott 16 stiga forskot í hléinu, 38-54.

Breiðabliksliðið mætti mun ákveðnara til síðari hálfleiks og hélt Skallagrími í aðeins tveimur stigum fyrstu sjö mínúturnar eftir hléið og minnkuðu muninn í eitt stig, 55-56. Skallagrímur skoraði aðeins tíu stig allan leikhlutann en var engu að síður fimm stigum yfir fyrir lokafjórðunginn, 59-64. Fjórði leikhluti var jafn og spennandi. Skallagrímskonur leiddu að jafnaði með þremur til fjórum stigum. Þegar tvær mínútur lifðu hafði Skallagrímur tveggja stiga forystu, 76-78. Breiðablik lagði allt í sölurnar á lokamínútunum, náði að komast yfir og stela sigrinum á síðustu mínútunni en Skallagrímskonur sátu eftir með sárt ennið. Lokatölur urðu 85-79, Breiðabliki i vil.

Shequila Joseph skoraði 25 stig, reif niður 17 fráköst og gaf sex stoðsendingar í liði Skallagríms. Sigrún Sjöfn Ámundadóttir var með 17 stig, tíu fráköst og sex stoðsendingar og Árnína Lena Rúnarsdóttir skoraði 15 stig.

Sanja Orazovic átti stórleik fyrir Breiðablik, skoraði 31 stig og tók tíu fráköst. Kelly Faris var ekki langt á eftir henni með 28 stig, tíu fráköst og sex stoðsendingar og Björk Gunnarsdóttir skoraði 17 stig.

Skallagrímskonur sitja í sjötta sæti deildarinnar með sex stig eftir níu leiki, tveimur stigum á eftir Val í sætinu fyrir ofan en jafnframt tveimur stigum fyrir ofan Hauka. Næst leika Skallagrímskonur miðvikudaginn 28. nóvember þegar þær mæta Keflvíkingum í Borgarnesi.

Skallagrímskonur rændar sigrinum