Skallagrímur mætti Þór Þ. í áttundu umferð Domino‘s deildar karla í körfuknattleik. Leikið var í Þorlákshöfn í gærkvöldi. Leikurinn var í járnum í fyrri hálfleik en í þeim síðari tóku heimamenn stjórnina og sigruðu að lokum með 87 stigum gegn 74.

Mikið jafnræði var með liðunum í upphafsfjórðungnum. Þór komst tvisvar fimm stigum yfir en Borgnesingar komu til baka og tóku forystuna undir lok fyrsta leikhluta, 22-24. Heimamenn komust yfir að nýju snemma í öðrum leikhluta og leiddu næstu mínúturnar. Skallagrímur jafnaði metin í 38-38 þegar þrjár mínútur voru eftir af fyrri hálfleik og liðin fylgdust að þar til hálfleiksflautan gall. Staðan í hléinu var jöfn, 45 stig á lið.

Heimamenn mættu ákveðnari til síðari hálfleiks, þéttu varnarleikinn mjög og létu Skallagrímsmenn heldur betur hafa fyrir hlutunum. Borgnesingar skoruðu aðeins 13 stig í þriðja leikhluta. Á meðan sigu heimamenn fram úr, hægt en örugglega og leiddu með 14 stigum fyrir lokafjórðunginn, 72-58. Skallagrímsmenn áttu ekki svör við góðum leik heimamanna í fjórða leikhluta frekar en í þeim þriðja. Þeim tókst að minnka muninn í tíu stig um miðbik fjórðungsins en nær komust þeir ekki og Þórsarar sigldu sigrinum heim á lokamínútunum. Lokatölur sem fyrr segir 87-74, Þór í vil.

Aundre Jackson var stigahæstur í liði Skallagríms með 16 stig og tók hann sex fráköst að auki. Eyjólfur Ásberg Halldórsson skoraði 14 stig og tók tíu fráköst, Matej Buovac skoraði 13 stig og Domagoj Samac var með tíu stig og sex fráköst.

Halldór Garðar Hermannsson átti frábæran leik fyrir heimamenn, skoraði 27 stig með 53% skotnýtingu og gaf sex stoðsendingar að auki. Nikolas Tomsick skoraði 19 stig og gaf ellefu stoðsendingar, Jaka Brodnik var með 19 stig og fimm fráköst og Kinu Rochford skoraði 13 stig og tók fimm fráköst.

Skallagrímur situr í tíunda sæti deildarinnar með fjögur stig eftir átta leiki, tveimur stigum á eftir næstu liðum fyrir ofan og tveimur stigum á undan botnliðunum tveimur, sem þó eiga bæði leik til góða. Næst leika Borgnesingar heima gegn Val, mánudaginn 10. desember næstkomandi.

Misstu dampinn í seinni hálfleik