Snæfell mátti sín lítils gegn toppliði Þórs Ak. þegar liðin mættust í sjöttu umferð 1. deildar karla í körfuknattleik. Leikið var í Stykkishólmi á föstudagskvöld. Leikurinn var einstefna nánast frá upphafi og gestirnir sigruðu að lokum stórt, 61-96.

Liðin fylgdust að þar til um miðjan upphafsfjórðunginn. Þá hallaði heldur betur undan fæti hjá Snæfellingum, sem skoruðu aðeins þrjú stig það sem eftir lifði leikhlutans. Á meðan fóru gestirnir mikinn og leiddu með 15 stigum eftir fyrsta leikhluta, 13-28. Akureyringar höfðu áfram góð tök á leiknum í öðrum fjórðungi og fóru með 20 stiga forskot inn í hléið, 28-48.

Snæfellingar náðu aðeins að laga stöðuna í eftir hléið, minnkuðu muninn í 16 stig þegar stutt var eftir af þriðja leikhluta. En gestirnir enduðu fjórðunginn á góðri rispu og höfðu 21 stigs forskot fyrir lokafjórðunginn, 49-70. Akureyringar bættu hægt og rólega við forskotið í fjórða leikhluta og unnu að lokum stórsigur, 61-96.

Deandre Mason var atkvæðamestur leikmanna Snæfells með 25 stig og tólf fráköst. Rúnar Þór Ragnarsson skoraði 16 stig og tók sex fráköst og Dominykas Zupkauskas var með ellefu stig og sjö stoðsendingar.

Kristján Pétur Andrésson var stigahæstur í liði gestanna með 25 stig og átta fráköst að auki. Damir Mijic skoraði 21 stig og tók sex fráköst, Pálmi Geir Jónsson var með 18 stig og Larry Thomas skoraði tíu stig, tók fimm fráköst og gaf átta stoðsendingar.

Snæfell er án sigurs á botni deildarinnar eftir sex leiki, en á leik til góða á Sindra sem einnig er án sigurs í sætinu fyrir ofan. Botnliðin tvö mætast í næstu umferð deildarinnar. Leikur Snæfells og Sindra fer fram á Höfn í Hornarfirði föstudaginn 23. nóvember næstkomandi.

Snæfellingar fengu skell