Skallagrímur tók á móti Keflavík í sjöundu umferð Domino‘s deildar karla í körfuknattleik í gærkvöldi.

Borgnesingar byrjuðu leikinn af krafti og komust í 9-2. Keflvíkingar svöruðu fyrir sig og komust inn í leikinn aftur. Eftir það var mikið jafnræði með liðunum, sem spiluðu bæði þétta vörn. Keflvíkingar leiddu með einu stigi eftir upphafsfjórðunginn, 23-22. Skallagrímsmenn misstu einbeitinguna í öðrum fjórðungi, gerðu ódýr mistök og gestirnir komust í 24-36. Eftir að Borgnesingar náðu að stilla saman strengi sína komu þeir sterkir til baka og jöfnuðu metin áður en hálfleiksflautan gall, 42-42.

Leikurinn var hnífjafn í síðari hálfleik og liðin skiptust á að leiða í þriðja leikhluta. Undir lok hans náðu Borgnesingar smá rispu og fimm stiga forskoti fyrir lokafjórðunginn, 70-65. Þeir bættu við í upphafi fjórða leikhluta og leiddu framan af honum. Keflvíkingar fylgdu fast á hæla þeirra og spennan magnaðist með hverri mínútunni. Skallagrímur leiddi þegar þrjár mínútur lifðu leiks en þá náðu gestirnir smá rispu og sjö stiga forskoti. Skallagrímsmenn minnkuðu muninn í tvö stig á lokasekúndum leiksins en nær komust þeir ekki. Keflavík hafði sigur, 95-97 í dramatískum leik í Borgarnesi.

Björgvin Hafþór Ríkharðsson setti upp þrennu fyrir Skallagrím, hann skorað 15 stig, tók tiú fráköst og gaf 16 stoðsendingar. Aundre Jackson var hins vegar stigahæstur með 31 stig og tíu fráköst að auki. Matej Buovac skoraði 28 stig og Kristófer Gíslason ellefu.

Michael Craiton var atkvæðamestur í liði gestanna með 26 stig, níu fráköst, fimm stoðsendingar og fimm stolna bolta. Gunnar Ólafssnon skoraði 20 stig, Hörður Axel Vilhjálmsson var með 14 stig og ellefu stoðsendingar, Magnús Már Traustason tólf stig og Reggie Dupree tíu stig.

Skallagrímur situr í áttunda sæti deildarinnar með fjögur stig eftir sjö leiki, jafn mörg og næstu lið fyrir neðan en tveimur stigum á eftir Haukum í sætinu fyrir ofan. Næst leikur Skallagrímur gegn Þór Ak. á útivelli fimmtudaginn 22. nóvember.

Dramatík í Borgarnesi