Snæfell lagði Íslandsmeistara Hauka, 85-90, í æsispennandi framlengdum leik í Domino‘s deild kvenna í körfuknattleik. Leikið var í Hafnarfirði í gærkvöldi.

Haukakonur byrjuðu af miklum krafti og komust í 14-0 áður en Snæfell komst á blað. En eftir að Snæfellskonur skoruðu fyrstu stigin sín léku þær afar vel og náðu að minnka muninn niður í fjögur stig áður en fyrsti leikhluti var úti, 23-19. Eftir það var leikurinn í járnum meira og minna. Liðin skiptust á að leiða í öðrum fjórðungi en Haukar leiddu með þremur stigum í hálfleik, 41-38.

Aldrei munaði meiru en fjórum stigum á liðinum í þriðja leikhluta og aðeins eitt stig skildi liðin að fyrir lokafjórðunginn. Snæfell náði yfirhöndinni snemma í fjórða leikhluta, komst fimm stigum yfir en Haukakonur höfðu þá minnkuðu muninn niður í eitt stig þegar tuttugu sekúndur lifðu leiks1 82-83. Þær fengu svo tvo vítaskot til að tryggja sér sigurinn en skoruðu aðeins úr öðru þeirra og því varð að grípa til framlengingar. Þar voru Snæfellskonur einfaldlega sterkari og tryggðu sér fimm stiga sigur, 85-90.

Kristen McCarthy átti stórleik fyrir Snæfell. Hún skoraði 36 stig, reif niður 18 fráköst, gaf fimm stoðsendingar og var með sex stolna bolta. Angelika Kowalska skoraði 18 stig og Berglind Gunnarsdóttir var með 17 stig og átta fráköst.

Lele Hardy var atkvæðamest í liði Hauka með 32 stig, 20 fráköst, sex stoðsendingar og sjö stolna bolta. Þóra Kristín Jónsdóttir var með 26 stig, sex fráköst og átta stoðsendingar og Sigrún Björg Ólafsdóttir tíu stig, sex fráköst og fimm stoðsendingar.

Snæfell situr sem stendur í öðru sæti deildarinnar með tíu stig, jafn mörg og KR í sætinu fyrir ofan. Næst leika Snæfellskonur miðvikudaginn 7. nóvember, þegar þær mæta Val í Stykkishólmi.

Snæfell lagði Íslandsmeistarana í framlengdum leik