Félag sauðfjárbænda í Dölum stóð að vanda fyrir haustfagnaði um liðna helgi. Dagskrá var með hefðbundnu sniði. Hrútasýningar voru í hvoru hólfi, annars vegar á Kjarlaksvöllum í Saurbæ og hins vegar á Skörðum í Miðdölum. Þá var sviðaveisla og dansleikur í Dalabúð í Búðardal á föstudagskvöldið þar sem hagyrðingar kváðu um allt milli himins og jarðar við góðar undirtektir gesta. Á laugardaginn var markaðsstemning í reiðhöllinni en þar var Íslandsmeistaramótið í rúningi jafnframt haldið. Um kvöldið var síðan grillveisla í Dalabúð og lauk hátíðinni með dansleik þar um kvöldið. Haustfagnaður FSD er eins konar uppskeruhátíð sauðfjárbænda í Dölum nú þegar sláturtíð er að ljúka og bændur fara að huga að því að hýsa fé fyrir veturinn.

: Haldið var hrútauppboð á báðum hrútasýningunum sem Jón Ingi Ólafsson stýrði með hrútshorn í hönd sem uppboðshamar. Ljósm. sla.

Myndasyrpu frá Haustfagnaði FSD er að finna í Skessuhorni vikunnar.

Haustfagnaður í Dölum um liðna helgi