Snæfell mátti sætta sig við tap gegn Hetti, 70-83, þegar liðin mættust í annarri umferð 1. deildar karla í körfuknattleik á föstudag. Leikið var í Stykkishólmi.

Gestirnir frá Egilsstöðum náðu undirtökunum snemma leiks en Snæfellingar voru aldrei langt undan. Fimm stigum munaði þegar þrjár mínútur voru eftir af fyrsta leikhluta. Hattarmenn áttu lokaorðið og höfðu átta stiga forskot fyrir annan fjórðung, 20-28. Annar leikhluti fór hægt af stað en gestirnir komust tíu stigum yfir um hann miðjan, 22-32. Þeirri forystu héldu þeir meira og minna óbreyttri allt þar til hálfleiksflautan gall. Staðan í hléinu var 35-45 fyrir gestina.

Höttur skoraði fyrstu átta stig síðari hálfleiks og komust í 35-53. Snæfellingar voru lengur í gang en tókst að minnka muninn niður í ellefu stig áður en þriðji leikhluti var úti, 49-60. Þeir settu síðan allt í botn í upphafi fjórða leikhluta og minnkuðu muninn í fimm stig. Aðeins vantaði herslumuninn upp á að Snæfellingar kæmust upp að hlið gestanna en svo varð ekki. Höttur náði að halda um það bil fimm stiga forskoti og bæta við nokkrum stigum á lokamínútunum. Lokatölur urðu því 70-83, Hetti í vil.

Deandre Mason var atkvæðamestur í liði Snæfells með 26 stig og 13 fráköst. Dominykas Zupkauskas skoraði 18 stig, gaf sjö stoðsendingar og tók sex fráköst og Darrel Flake var með ellefu stig og átta fráköst.

Andrée Fares Michelsson, fyrrum leikmaður Snæfells, átti stórleik í liði Hattar og skoraði 37 stig. Charles Clark var með 18 stig, níu fráköst og fimm stoðsendingar og David Guardia Ramos skoraði tólf stig.

Snæfell er án sigurs í sjöunda sæti deildarinnar eftir fyrstu tvo leiki vetrarins. Næst leika Snæfellingar á föstudaginn, 19. október, þegar liðið mætir Fjölni á útivelli.

Snæfell tapaði heima gegn Hetti