Skallagrímur varð að játa sig sigraðan gegn Íslandsmeisturum KR í fyrstu umferð Domino‘s deildar karla í gær. Borgnesingar vru sterkir af fyrri hálfleik og höfðu yfirhöndina á löngum köflum. En heimamenn í KR náðu að snúa dæminu í þeim síðari og sigruðu að lokum með 109 stigum gegn 93.

Skallagrímsmenn voru ákveðnir í upphafi leiks. Þeir leiddu með tveimur til þremur stigum en KR fylgdi þeim hvert fótmál. Heimamenn leiddu reyndar eftir fyrsta leikhluta, 28-26, en Borgnesingar tóku forystuna strax aftur í upphafi annars fjórðungs og leiddu þar til undir lok fyrri hálfleiks. Þá náði KR smá rispu, tók forystuna og hafði sex stiga forskot í hálfleik, 58-52.

KR-ingar þéttu varnarleikinn eftir hléið og gerðu Skallagrímsmönnum erfitt fyrir. Borgnesingar náðu bara að skora fjögur stig fyrstu fimm mínútur síðari hálfleiksins og heimamenn náðu 14 stiga forystu, 70-56. Skallagrímsmenn náðu ekki að svara fyrir sig og KR-ingar leiddu með ellefu stigum fyrir lokafjórðunginn, 86-75. Aftur fóru Borgnesingar hægt af stað í þeim leikhluta og voru stigalausir fyrstu fjórar mínúturnar. Þá var staðan orðin 94-75 og brekkan orðin æði brött fyrir leikmenn Skallagríms. Það sem eftir lifði leiksins stjórnuðu KR-ingar ferðinni og sigruðu að lokum með 16 stigum, 109-93.

Matej Buovac var stigahæstur leikmanna Skallagríms með 25 stig og fimm fráköst að auki. Aundre Jackson skoraði 23 stig og tók fimm fráköst, Eyjólfur Ásberg Halldórsson var með 20 stig, fimm fráköst og átta stoðsendingar, Björgvin Hafþór Ríkharðsson skoraði tíu stig og tók fimm fráköst og Bjarni Guðmann Jónsson var með tíu stig.

Julian Boyd fór mikinn í liði KR-inga með 37 stig og tólf fráköst. Jón Arnór Stefánsson var með 15 stig og sex stoðsendingar, Orri Hilmarsson skoraði tólf stig, Sigurður Þorvaldsson var með ellefu stig og sex fráköst og Emil Barja tíu stig, átta fráköst og sjö stoðsendingar.

Næsti leikur Skallagríms er jafnframt fyrsti heimaleikur liðsins í vetur. Sá fer fram í Borgarnesi næstkomandi fimmtudagskvöld, 11. október, þegar Borgnesingar fá Grindvíkinga í heimsókn.

Skallagrímur varð að lúta í gras gegn Íslandsmeisturunum