Snæfell vann góðan útisigur á Breiðabliki, 80-93, í tvíframlengdum leik í fyrstu umferð Domino‘s deildar kvenna í gær.

Snæfellskonur náðu sér alls ekki á strik í upphafi leiks og skoruðu aðeins sex stig í fyrsta leikhluta. Á meðan skoraði Breiðablik 14 stig og áttu eftir að bæta þremur við forskotið í upphafi annars fjórðungs. Þá tók Snæfellsliðið loksins við sér og var mun sterkara það sem eftir lifði fyrri hálfleiks. Með góðum leikkafla minnkuðu Snæfellskonur muninn niður í tvö stig fyrir hléið, 23-21.

Jafnt var á með liðunum í upphafi síðari hálfleiks og Snæfell komst yfir í fyrsta sinn í leiknum um miðjan þriðja leikhluta. Breiðablik náði þá góðri rispu og leiddi með sex stigum fyrir lokafjórðunginn, 44-38. Snæfellskonur voru ekki lengi að minnka muninn niður í eitt stig og þá tóku við æsispennandi lokamínútur. Þær voru nálægt því að stela sigrinum, því þær komust í 55-59 þegar rúm mínúta lifði leiks og leiddu fram á síðustu sekúndurnar. Kristen McCarthy kom Snæfelli í 60-63 af vítalínunni þegar þrjár sekúndur lifði leiks. Hún hitti hins vegar ekki úr seinna vítinu, Breiðablik tók frákastið, boltinn var sendur fram og Sóllilja Bjarnadóttir jafnaði metin með síðasta skoti leiksins. Staðan 63-63 og því varð að grípa til framlengingar.

Snæfell leiddi með þremur stigum fyrri hluta framlengingarinnar áður en Breiðablik jafnaði og því þurfti að framlengja aftur. Þar komust Snæfellskonur tveimur stigum yfir og innsigluðu svo sigurinn með góðum lokaspretti seinustu tvær mínútur framlengingarinnar. Lokatölur urðu 80-93, Snæfelli í vil.

Kristen McCarthy var atkvæðamest í liði Snæfells með 34 stig og 16 fráköst. Angelika Kowalska skoraði 17 stig, tók ellefu fráköst og gaf fimm stoðsendingar. Helga Hjördís Björgvinsdóttir skoraði 14 stig og Gunnhildur Gunnarsdóttir skoraði ellefu stig og tók tíu fráköst.

Björk Gunnarsdóttir var stigahæst í liði Breiðabliks með 21 stig og fimm fráköst og gaf sex stoðsendingar að auki. Kelly Faris skoraði 20 stig og tók níu fráköst og Sóllilja Bjarnadóttir var með 13 stig og fimm fráköst.

Næst leikur Snæfell á laugardaginn, 6. október næstkomandi, þegar liðið tekur á móti Íslandsmeisturum Keflavíkur í fyrsta heimaleiknum í vetur. Leikurinn hefst kl. 15:00 í íþróttamiðstöðinni í Stykkishólmi.

Snæfellskonur sigruðu í tvíframlengdum leik