Eftir að hafa nýlega tryggt sér sæti í þriðju deild á næsta tímabili þá þurfti Skallagrímur að sætta sig við stórt tap gegn Reyni Sandgerði þegar liðin mættust í úrslita viðureign fjórðu deildar á laugardaginn. Leikurinn fór fram á hlutlausum velli í Keflavík.

Fyrsta mark kom frá Sandgerðismönnum strax á sjöttu mínútu þegar Magnús Þórir Matthíasson skilaði boltanum í netið og kom sínum mönnum yfir. Fjórum mínútum seinna náði Kristinn Aron Hjartarson að jafna metin fyrir Skallagrím. Töluvert fjör færðist í leikinn og jafnræði var með liðum framan af fyrri hálfleik. Þegar leið á tók þó að halla undan fæti hjá Borgnesingum sem Reyknesingar nýttu sér og sóttu í kjölfarið ákaft. Á 36. mínútu var dæmt víti á Skallagrímsmenn. Magnús Þórir fór á punktinn og skilaði boltanum örugglega í netið og kom Reyni yfir. Rétt undir lok hálfleiks bætti Max Grammel þriðja markinu fyrir Sandgerðismenn sem fóru þannig með gott nesti inn í hálfleikinn, 3-1.

Ekki leið á löngu í síðari hálfleik þar til Reynir skoraði sitt fjórða mark. Það kom strax á 50. mínútu þegar Strahinja Pajic fann boltann og skoraði. Skallagrímsmenn voru lítið að ógna marki Sandgerðismanna og áttu fá svör við þeirra aðgerðum. Á 55. mínútu áttu Reyknesingar góða skiptingu en þá kom inn á Óli Baldur Bjarnason. Hann gerði sér lítið fyrir og skoraði tvö mörk á næstu tveimur mínútum og setti sína menn í stöðuna, 6-1. Matthías Þórir setti síðasta naglann í kistu Skallagrímsmanna á 77. mínútu þegar hann skoraði sjöunda mark sinna manna og jafnframt sitt þriðja mark í leiknum og innsiglaði þannig verðuskuldaðan Íslandsmeistaratitil í fjórðu deild karla.

Með þessum leik lýkur keppnistímabili að sinni í fjórðu deild karla. Eins og fyrr segir þá hafa Skallagrímsmenn ásamt Reyni Sandgerði og Kórdrengjum fært sig upp um deild og keppa í þriðju deild að ári.

Skallagrímsmenn lutu í gras gegn Reyni Sandgerði