Eftir langa 15 ára dvöl í neðstu deild fótboltans hefur karlalið Skallagríms í Borgarnesi loks snúið blaðinu við og tryggt sér sæti í 3. deild á næsta tímabili og þátttöku í úrslitaleik 4. deildar gegn Reyni í Sandgerði. Skallagrímur hafði betur gegn Álftnesingum í einvígi liðanna í gærkvöldi og fara Borgnesingar upp um deild á fleiri mörkum skoruðum á útivelli en einvígi liðanna endaði samanlagt 6-6.

Það var þétt staðið í stúkunni og góð stemning hjá stuðningsmönnum beggja liða við Bessastaðavöll í gærkvöldi þegar Skallagrímur og Álftanes mættust í seinni viðureign liðanna í undanúrslitum 4. deildar. Fyrri leik liðanna í Borgarnesi lauk með 3-2 sigri Skallagríms og Borgnesingar voru því í kjörstöðu til að tryggja sér sæti í 3. deildinni að ári. Leikurinn byrjaði hins vegar ekki vel fyrir Skallagrímsmenn sem skoruðu sjálfsmark strax á þriðju mínútu eftir vandræðagang í eigin vítateig. Jafnræði var þó með liðunum í kjölfarið og var ljóst að hvorugt liðið ætlaði að gefa eftir þar sem sæti í þriðju deild var í húfi. Á 24. mínútu fengu svo heimamenn vítaspyrnu og var það Arnar Már Björgvinsson sem fór á punktinn fyrir Álftnesinga og skilaði boltanum fast í netið. Ekki mátti sjá að forskot heimamanna hefði stóráhrif á Skallagrímsmenn sem spiluðu vel á milli sín og sóttu af krafti. Borgnesingurinn Viktor Ingi Jakobsson átti svo hörkuskot á 42. mínútu sem endaði í netinu og minnkaði Viktor þannig muninn áður en flautað var til hálfleiks. 2-1 fyrir Álftnesinga.

Seinni hálfleikur var engu síðri og bauð upp á mikla skemmtun fyrir stuðningsmenn sem hvöttu lið sín til dáða. Bæði lið byrjuðu vel en því sem leið á þá voru Skallagrímsmenn skeinuhættari í sínum sóknaraðgerðum. Álftnesingar áttu þó inn á milli hættulegar skyndisóknir sem þétt vörn gestanna stóð af sér. Leó Örn Þrastarson jafnaði svo metin fyrir Borgnesinga á 75. mínútu sem að sama skapi kom sér vel fyrir Skallagrímsmenn upp á markatölu á útivelli að gera og ljóst að Álftnesingar þyrftu að skora eitt mark til að jafna einvígið og tvö mörk til viðbótar til að vinna það. Hart var barist síðasta korterið. Heimamenn gerðust sérstaklega ágengir við mark gestanna sem þurftu að hafa sig alla við að verjast. Það var svo á þriðju mínútu uppbótartíma að Halldór Fannar Júlíusson skoraði þriðja mark þeirra bláklæddu og tryggði þeim þannig framlengingu. Mikill hiti var í mönnum, svo mikill að þjálfari Skallagríms fékk rautt spjald á fjórðu mínútu uppbótartíma fyrir að rífa kjaft og þurfti í kjölfarið að víkja af velli. Staðan 3-2 Álftanesi í vil eftir venjulegan leiktíma.

Í framlengingunni voru bæði lið til alls líkleg og skiptust á að halda boltanum. Á 98. mínútu náði Guillermo Gonzalez Lamarca að setja sína menn í óskastöðu er hann skoraði þriðja mark gestanna og jafnaði þannig metin. Þess má geta að Guillermo hefur skorað 19 mörk í 16 leikjum sem hann hefur spilað með Skallagrími í sumar. Seinni hálfleikur framlengingarinnar var keimlíkar lokamínútunum í uppbótartíma venjulegs leiktíma. Álftnesingar sóttu hart að gestunum sem spiluðu þétta vörn og voru komnir aftarlega á sinn vallarhelming. Það var svo á 120. mínútu að Atli Freyr Ottesen Pálsson fann boltann í vítateig gestanna og skoraði fyrir sína menn. Ekki dugði það þó fyrir Álftnesinga sem þurftu að sætta sig við tap í einvíginu. Lokatölur 4-3 fyrir Álftanes í dramatískum leik.

Eins og fyrr segir þá hafa Skallagrímsmenn nú tryggt sér sæti í þriðju deildinni að ári og sömuleiðis hafa þeir tryggt sér þátttöku í úrslitaviðureign 4. deildar gegn Reyni í Sandgerði. Sá leikur fer fram laugardaginn 14. september. Ástæða er til að óska Borgnesingum með árangurinn og þess að fimmtán ára eyðimerkurgöngu þeirra í neðstu deild er nú lokið.

Vel var mætt í stúkuna. Hér sést Þorfinnur Gústaf Þorfinnsson sveifla Skallagríms fánanum til stuðnings sinna manna. Ljósm. glh

Liðið stillti sér upp til myndatöku að leik loknum. Ljósm. Þröstur Albertsson.

Skallagrímur tryggði sér sæti í þriðju deild