ÍA sigraði botnlið Magna, 3-2, í líflegum baráttuleik norður á Grenivík á laugardag.

Leikurinn fór heldur betur fjörlega af stað. Eftir örfáar mínútur átti Stefán Teitur Þórðarson stangarskot og stuttu síðar var hann búinn að koma ÍA yfir. Góðri sókn Skagamanna lauk með skoti sem var varið út í teiginn. Þar var Stefán Teitur fyrstur á boltann og skoraði auðveldlega.

Á 14. mínútu náðu heimamenn að jafna. Kristinn Þór Rósbergsson kom boltanum á Lars Óla Jessen, sem gerði vel í að koma sér í gott færi sem hann kláraði snyrtilega. En fjörinu var ekki lokið, því aðeins einni mínútu síðar sendi Ólafur Valur Valdimarsson laglega sendingu inn fyrir vörn Magna á Jeppe Hansen sem skoraði úr góðu færi. Staðan orðin 2-1 fyrir ÍA og aðeins korter liðið af leiknum.

Bæði lið fengu sín færi það sem eftir lifði hálfleiksins en Skagamenn voru nær því að skora. Albert Hafsteinsson lét verja frá sér í upplögðu marktækifæri og Jeppe skallaði boltann rétt yfir markið úr dauðafæri. Magnamenn ógnuðu helst marki eftir föst leikatriði og uppskáru ágætis færi upp úr þeim. Staðan í hálfleik var því 2-1 fyrir ÍA.

Síðari hálfleikur byrjaði með enn meiri látum en sá fyrri, ótrúlegt en satt. Strax á fyrstu mínútu eftir hléið fékk Stefán Teitur boltann, fór auðveldlega framhjá nokkrum varnarmönnum Magna og skoraði snyrtilegt mark. Tveimur mínútum síðar átti Lars Óli laglega sending innfyrir vörn ÍA á Kristin Þór Rósbergsson sem fór framhjá Árna Snæ Ólafssyni í marki ÍA og skoraði í autt markið. Staðan orðin 3-2 eins og hendi væri veifað.

Litlu munaði að Stefán Teitur hefði fullkomnað þrennu sína tíu mínútum síðar, þegar boltinn féll til hans á markteig eftir hornspyrnu. En hann hitti boltann illa og skotið var laust og beint á markvörðinn. Leikurinn róaðist aðeins eftir þetta. Steinar Þorsteinsson fékk dauðafæri á 78. mínútu en skaut yfir markið. Gestirnir blésu til sóknar síðustu tíu mínúturnar en höfðu ekki erindi sem erfiði. Lokatölur leiksins urðu 3-2, ÍA í vil.

Skagamenn hafa 43 stig í toppsæti deildarinnar, stigi meira en HK í öðru sæti og fimm stigum meira en Víkingur Ó. í þriðja sæti þegar þrjár umferðir eru eftir. ÍA og Víkingur Ó. mætast í toppslag og Vesturlandsslag deildarinnar næstkomandi laugardag, 8. ágúst. Sá leikur fer fram á Akranesvelli.

Skagamenn sigruðu í fjörugum leik