ÍA heimsótti Sindra á Hornarfjörð í 16. umferð 1. deildar kvenna í knattspyrnu í gær. Fyrir leikinn var ÍA í þriðja sæti en Sindri á botninum. Sást það glöggt á gangi leiksins, því Skagakonur höfðu algera yfirburði frá fyrstu mínútu og sigruðu að lokum stórt, 6-0.

Leikurinn byrjaði með látum þegar Sigrún Eva Sigurðardóttir skoraði fyrsta mark ÍA strax á fjórðu mínútu leiksins. Það var síðan fyrirliðinn Unnur Ýr Haraldsdóttir sem bætti öðru marki við með góðu skoti á 13. mínútu leiksins. Maren Leósdóttir bætti þriðja markinu við á 26. mínútu og áfram héldu Skagakonur að sækja það sem eftir lifði fyrri hálfleiks. Rétt fyrir hléið skoraði Heiðrún Sara Guðmundsdóttir og kom ÍA í 4-0 áður en fyrri hálfleikur var úti.

Síðari hálfleikur var heldur rólegri en sá fyrri en yfirburðir ÍA voru miklir og Skagakonur réðu ferðinni í einu og öllu. Miðvörðurinn Snædís logadóttir skoraði fimmta mark ÍA á 58. mínútu og var þetta hennar fyrsta mark í deildinni fyrir liðið. Það var síðan Eva María Jónsdóttir, hinn miðvörður ÍA, sem skoraði sjötta og síðasta mark leiksins með fallegu skoti á 85. mínútu leiksins. Skagakonur sóttu áfram en þrátt fyrir nokkur ágætis tækifæri til viðbótar tókst þeim ekki að bæta við. Lokatölur urðu því 6-0 stórsigur ÍA.

Með sigrinum heldur ÍA sér inni í toppbaráttu deildarinnar. Liðið hefur 34 stig í þriðja sæti, þremur stigum á eftir Keflavík í sætinu fyrir ofan og fimm stigum á eftir toppliði Fylkis. ÍA á tvo leiki eftir í mótinu en liðin fyrir ofan eiga hins vegar bæði þrjá leiki eftir. Skagakonur eiga því enn góða möguleika á að fara upp um deild en þurfa að treysta á hagstæð úrslit í öðrum leikjum. Næst mætir ÍA sameiginlegu liði Aftureldingar/Fram, mánudaginn 10. september næstkomandi. Leikið verður á Akranesi.

Skagakonur völtuðu yfir Sindra