Víkingur Ó. heldur henn í vonina um að komast upp í efstu deild karla í knattspyrnu eftir verðskuldaðan 2-0 sigur á á Þór í toppslag 1. deildar karla í gær.

Heimamenn í Ólafsvík voru mun sterkari í upphafi leiks, þeir sóttu nokkuð stíft en gestirnir vörðust. Á 23. mínútu var brotið á Sasha Litwin innan vítateigs Þórsara og vítaspyrna dæmd. Gonzalo Zamorano fór á punktinn og skoraði af miklu öryggi. Víkingar komnir í 1-0 og hefðu getað bætt öðru marki við strax í næstu sókn en Aron Birkir Stefánsson varði vel frá Kwame Quee í dauðafæri. Leikurinn datt aðeins niður það sem eftir lifði fyrri hálfleiks. Þórsarar beittu löngum boltum sem sköpuðu litla ógn og leikmenn Víkings héldu sig frekar til hlés í sóknarleiknum. Staðan í hálfleik því 1-0.

Fyrri hálfleikur fór nokkuð fjörlega af stað. Gestirnir klúðruðu dauðafæri strax í upphafi og Ólafsvíkingar fengu líka nokkur ágætis marktækifæri. Eftir um klukkustundar leik fengu heimamenn tvö dauðafæri þar sem þeir hefðu átt að gera út um leikinn. Fyrst fékk Gonzalo sendingu inn fyrir vörnina þar sem hann var einn á móti Aroni markverði. Hann reyndi að vippa boltanum yfir Aron en mistókst það. Stuttu síðar slapp Kwame einn í gegn, lék á Aron en fór of utarlega og skaut í hliðarnetið. En ekki leið á löngu þar til Ólafsvíkingar náðu að auka forystuna. Gonzalo fékk þá góða sendingu og skoraði einn á móti markverði. Víkingur kominn í 2-0. Fátt markvert gerðist það sem eftir lifði og því urðu það lokatölur leiksins.

Víkingur lyfti sér með sigrinum upp í þriðja sæti deildarinnar með 38 stig, fjórum stigum á eftir HK og fimm stigum á eftir ÍA þegar þrjár umferðir eru eftir. Ólafsvíkingar eiga því enn möguleika á að ná öðru af tveimur efstu sætunum, sem gefa keppnisrétt í Pepsi deild að ári. Næsti leikur Víkings er Vesturlandsslagur og toppslagur gegn ÍA. Sá leikur fer fram á Akranesi á laugardaginn.

Ólafsvíkingar geta enn komist upp