Knattspyrnumaðurinn Arnór Sigurðsson frá Akranesi gekk í dag í raðir rússneska stórveldisins CSKA Moskva frá sænska liðinu IFK Norrköping. Kaupverðið er talið vera um fjórar milljónir evra, sem samsvarar um það bil 500 milljónum íslenskra króna. Samningaviðræður hafa staðið yfir í tvær vikur, eða allt frá 16. ágúst þegar rússneska liðið gerði fyrst tilboð í leikmanninn.

Arnór er fæddur árið 1999 og leikur stöðu miðjumanns. Hann er uppalinn hjá ÍA og lék sinn fyrsta leik með meistaraflokki ÍA í Pepsi deildinni árið 2015. Hann kom síðan við sögu í sex leikjum með liði Skagamanna í deild og bikar árið 2016. Arnór var síðan seldur til IFK Norrköping vorið 2017 við góðan orðstír. Hann hefur byrjað í tíu af 19 leikjum liðsins það sem af er tímabili og komið við sögu í 17 þeirra. Í þeim leikjum hefur hann skorað þrjú mörk og lagt upp önnur þrjú. Auk þess hefur Arnór verið fastamaður í yngri landsliðum Íslands undanfarin ár.

ÍA fær tíu prósent

Vísir greinir frá því að þegar ÍA seldi Arnór til IFK Norrköping fyrir rúmu ári síðan hafi verið sett klásúla í kaupsamningin. Kvað hún á um að ÍA myndi fá tíu prósent af andvirði næstu sölu, færi svo að Arnór yrði seldur frá sænska liðinu. Nú þegar CSKA Moskva hefur keypt Arnór fyrir sem nemur um það bil 500 milljónum króna má knattspyrnufélag ÍA ví eiga von á að fá um það bil 50 milljónir króna í sinn hlut. Slík upphæð er mikil búbót fyrir lið Skagamanna, eins og hún væri raunar fyrir öll knattspyrnulið hér á landi.

ÍA hefur haft þá leikmannastefnu undanfarin ár að spila ungum leikmönnum sem eru uppaldir hjá félaginu. Hefur liðið nú með skömmu millibili selt tvo unga og efnilega knattspyrnumenn í atvinnumennsku, Arnór Sigurðsson til IFK Norrköping í fyrravor og Tryggva Hrafn Haraldsson til Halmstad í Svíþjóð fyrir rétt rúmu ári síðan.

Arnór Sigurðsson til CSKA Moskva