ÍA og HK gerðu markalaust jafntefli þegar liðin mættust í toppslag 1. deildar karla í knattspyrnu á Akranesvelli nú í kvöld. Leikurinn var heilt yfir hálf bragðdaufur en Skagamenn hefðu hæglega getað sótt sigur því þeir misnotuðu tvær vítaspyrnur í leiknum.

Fyrst var það Jeppe Hansen sem fór á vítapunktinn á lokamínútu fyrri hálfleiks. Hann var hikandi í aðhlaupinu, spyrnan slök og Arnar Freyr Ólafsson í marki gestanna átti ekki í vandræðum með að verja.

Á 67. mínútu fékk ÍA annað víti og að þessu sinni steig Vincent Weijl á punktinn. Hann skaut á mitt markið en Arnar Freyr stóð sem fastast og varði skot hans auðveldlega yfir. HK-ingar fengu gott færi eftir skyndisókn seint í leiknum en skutu framhjá og lyktaði leiknum því með 0-0 jafntefli.

Víkingur Ó með góðan útisigur

Víkingur Ó. lyfti sér upp í þriðja sæti deildarinnar með góðum sigri á Leikni R. á útivelli, 2-1. Ólafsvíkingar byrjuðu af krafti og komust yfir strax á 9. mínútu með marki Gonzalo Zamorano. Hann fékk boltann í teignum, lék á tvo varnarmenn og lagði hann svo í hornið fjær. Snyrtilegt mark hjá Gonzalo.

Staðan var 1-0 í hálfleik og allt þar til Kwame Quee bætti öðru marki Ólafsvíkinga við úr vítaspyrnu á 78. mínútu. Fjórum mínútum síðar minnkaði Sævar Atli Magnússon muninn, einnig úr víti en þar við sat. Víkingur Ó. sigraði 2-1 og fer heim með þrjú stig í farteskinu.

: Liðsmenn Víkings Ó. fagna marki fyrr í sumar. Ljósm. úr safni.

Þéttist á toppnum

Úrslit kvöldsins þýða að ÍA trónir áfram á toppi deildarinnar með 40 stig, einu stigi á undan HK í sætinu fyrir neðan. Víkingur Ó. lyftir sér upp í þriðja sæti með 35 stig, stigi meira en Þór og þremur stigum á undan Þrótti R. þegar fjórar umferðir eru eftir.

Skagamenn leika næst laugardaginn 1. september þegar þeir sækja Magna heim á Grenivík. Ólafsvíkingar spila daginn eftir, sunnudaginn 2. september, þegar þeir fá Þór í heimsókn í toppslag umferðarinnar.

Spennan eykst á toppi 1. deildar karla