Skagamenn unnu góðan útisigur á liði ÍR, 2-0, þegar liðin mættust í 1. deild karla í knattspyrnu á laugardag. Var þetta fimmti sigurleikur ÍA í röð.

Leikurinn var fremur tíðindalítill fyrst um sinn. Skagamenn voru sterkari og sýndu á köflum prýðilega sóknartilburði. Þeim tókst að skapa sér nokkur ágætis marktækifæri en þau fóru öll forgörðum. Það var því ekki fyrr en á 25. mínútu að Stefán Teitur Þórðarson náði að brjóta ísinn og koma ÍA yfir. Eftir góðan undirbúning og sendingu Jeppe Hansen fyrir markið áttu Skagamenn skot sem Helgi Freyr Þorsteinsson í marki ÍR-inga varði vel. En Stefán Teitur var fyrstur að átta sig og náði að koma frákastinu í netið.

Bæði lið fengu ágætis færi næstu tíu mínúturnar eða svo en eftir það datt leikurinn aðeins niður. Heimamenn vildu fá víti á lokamínútum fyrri hálfleiks þegar Gísli Martin Sigurðsson féll í teignum en dómarinn var ekki á sama máli. Staðan því 1-0 í hléinu, ÍA í vil.

Seinni hálfleikur fór fremur rólega af stað og mikið jafnræði var með liðunum. ÍR-ingar fengu dauðafæri á 58. mínútu þegar Brynjar Óli Bjarnason slapp einn í gegnum vörn Skagamanna en skot hans var rétt framhjá markinu. Skagamenn sóttu í sig veðrið eftir því sem leið á leikinn og náðu að auka forystuna á 73. mínútu. Hallur Flosason átti þá góða sendingu út í vítateig heimamanna á Jeppe sem var aleinn og óvaldaður og átti ekki í vandræðum með að skora.

Skömmu fyrir leikslok fékk ÍR-ingurinn Gísli Martin beint rautt fyrir kjaftbrúk og heimamenn því manni færri síðustu mínúturnar. Það hafði þó engin áhrif á gang leiksins á lokamínútunum. Skagamenn sneru heim með sanngjarnan 2-0 sigur og þrjú stig í farteskinu.

ÍA trónir á toppi deildarinnar með 39 stig, einu stigi meira en HK í sætinu fyrir neðan. Þessi tvö lið mætast á Akranesvelli í sannkölluðum toppslag næstkomandi föstudagskvöld, 24. ágúst.

Fimm sigrar í röð hjá ÍA