Skagamenn halda fast í toppsæti 1. deildar karla í knattspyrnu eftir 2-0 sigur á Fram á Akranesvelli í gær. Stefán Teitur Þórðarson skoraði bæði mörk ÍA á fjögurra mínútna kafla í síðari hálfleik, en Skagamenn höfðu verið sterkara lið vallarins frá fyrstu mínútu leiksins.

En þrátt fyrir að Skagamenn væru sterkari og sýndu á köflum prýðilega sóknartilburði voru það gestirnir sem fengu bestu færin í fyrri hálfleik. Árni Snær Ólafsson þurfti að taka á honum stóra sínum á 22. mínútu þegar hann varði frábærlega frá Tiago Fernandes sem var sloppinn einn í gegnum vörn ÍA. Á lokamínútu fyrri hálfleiks átti Stefán Teitur Þórðarson góða aukaspyrnu með jörðinni sem markvörður gestanna átti í vandræðum með. Engum Skagamanni tókst hins vegar að gera sér mat úr því, gestirnir geystust fram í skyndisókn sem lauk með skoti hárfínt framhjá markinu.

Skagamenn voru mjög ákveðnir í byrjun síðari hálfleiks og litlu munaði að þeir kæmust yfir á 52. mínútu eftir hraða sókn en Bjarki Steinn Bjarkason skaut hárfínt yfir markið úr upplögðu marktækifæri. Það var síðan Stefán Teitur sem braut ísinn á 59. mínútu. Steinar Þorsteinsson fór illa með varnarmann gestanna, sendi lágan bolta fyrir á Stefán Teit sem gat ekki annað en skorað í opið markið. Aðeins fjórum mínútum síðar skoraði Stefán Teitur aftur þegar hann kláraði vel eftir góða sendingu frá Albert Hafsteinssyni. Staðan orðin 2-0 eins og hendi væri veifað.

Leikurinn róaðist töluvert eftir þetta og fátt markvert gerðist það sem eftir lifði. Fleiri mörk voru ekki skoruð og tveggja marka sigur ÍA því staðreynd. Skagamenn halda toppsætinu í deildinni með 36 stig, stigi meira en HK í sætinu fyrir neðan. Næst leikur ÍA á laugardaginn, 18. ágúst, þegar liðið heimsækir ÍR.