ÍA vann stórsigur á Þór frá Akureyri, 5-0, þegar liðin mættust í toppslag 1. deildar karla í knattspyrnu á föstudagskvöld. Leikið var í blíðskaparveðri á Akranesvelli.

Leikurinn fór nokkuð rólega af stað og hvorugu liðinu tókst að skapa sér nein afgerandi marktækifæri framan af fyrri hálfleik. Skagamenn voru meira með boltann en gestirnir frá Akureyri lágu til baka og vörðust vel. En það var á 38. mínútu sem ÍA komst yfir. Þórður Þorsteinn Þórðarson sendi þá fallega fyrirgjöf beint á kollinn á Arnóri Snæ Guðmundssyni sem skallaði boltann í netið af stuttu færi. Staðan í hálfleik 1-0.

Flóðgáttirnar áttu síðan eftir að opnast eftir hléið. Arnór Snær var aftur á ferðinni á 49. mínútu þegar hann skoraði annað skallamark eftir fyrirgjöf Steinars Þorsteinssonar. Arnar Már Guðjónsson skoraði síðan stórkostlegt mark aðeins fimm mínútum síðar. Skagamenn fengu aukaspyrnu rétt fyrir aftan miðju. Arnar sá að markvörður Þórs stóð allt of framarlega og lét bara vaða yfir hálfan völlinn. Boltinn sveif yfir markvörðinn og alla leið í netið. Skagamenn komnir í 3-0 og með tögl og hagldir á leiknum.

Leikurinn róaðist nokkuð eftir þriðja mark Skagamanna en þeir áttu engu að síður eftir að skora fleiri. Einar Log Einarsson skoraði snyrtilegt skallamark eftir hornspyrnu á 80. mínútu leiksins. Steinar bætti síðan fimmta marki ÍA við með því lyfta boltanum yfir markvörð Þórsara á 87. mínútu og stórsigur ÍA staðreynd.

Með sigrinum lyftu Skagamenn sér upp í annað sæti deildarinnar með 27 stig eftir 13 leiki, jafn mörg og Víkingur Ó. í sætinu fyrir neðan en tveimur stigum á eftir toppliði HK. ÍA leikur næst á miðvikudag, 1. ágúst, þegar liðið heimsækir Hauka.

Skagamenn völtuðu yfir Þór