Sigurður Þór Sigursteinsson ásamt Magnúsi Guðmundssyni, formanni knattspyrnufélagsins. Ljósm. KFÍA.

Sigurður Þór ráðinn framkvæmdastjóri KFÍA

Sigurður Þór Sigursteinsson hefur verið ráðinn í starf framkvæmdastjóra knattspyrnufélags ÍA. Tekur hann við starfinu af Huldu Birnu Baldursdóttur frá 1. ágúst næstkomandi.

Sigurður er Skagamaður, uppalinn hjá ÍA og lék 106 leiki með meistaraflokki á árunum 1990 til 2001, auk þess að leika 16 leiki fyrir yngri landslið Íslands. „Það er mjög spennandi að taka við starfi framkvæmdastjóra knattspyrnufélags ÍA en ég þekki vel til félagsins sem leikmaður, fyrrum stjórnarmaður, foreldri og stuðningsmaður. Einnig hef ég setið í meistaraflokksráði KFÍA og sinnt öðrum verkefnum hjá félaginu,“ segir Sigurður. „Ég hef sterkar tilfinningar til félagsins og hlakka mikið til að starfa með öflugum hópi stjórnar, starfsmanna, iðkenda og þjálfara KFÍA. Framundan eru spennandi tímar uppbyggingar og framfara hjá félaginu og það eru forréttindi að fá tækifæri til að vera virkur þátttakandi í þeirri vegferð,“ segir Sigurður.

Magnús Guðmundsson, formaður KFÍA, segir ánægjulegt að fá Sigurð til starfa hjá félaginu. „Við erum mjög spennt fyrir að fá Sigurð inn í starf framkvæmdastjóra félagsins. Honum fylgir mikil reynsla af knattspyrnunni því Sigurður og hans fjölskylda hafa verið áberandi í starfi félagsins í fjölmörg ár. Ég hef trú á því að Siggi sé frábær viðbót í annars mjög öflugan hóp starfsfólks hjá félaginu. Ég vil samtímis þakka Huldu Birnu fyrir hennar framlag til félagsins,“ segir Magnús.

Líkar þetta

Fleiri fréttir