Hulda Birna Baldursdóttir, framkvæmdastjóri KFÍA.

Hulda Birna hættir hjá ÍA

Hulda Birna Baldursdóttir, framkvæmdastjóri Knattspyrnufélags ÍA, hefur sagt starfi sínu lausu frá og með 1. ágúst næstkomandi. Hún hefur verið framkvæmdastjóri félagsins frá 2016 en lætur nú að störfum af persónulegum ástæðum. Frá þessu er greint í tilkynningu á vef knattspyrnufélagsins. „Það hefur verið spennandi áskorun fyrir mig að takast á við að vera framkvæmdastjóri KFÍA, félagið sem ég er alin upp í. Það er frábær kraftur í öllu starfinu, frábærir stuðningsaðilar, þjálfarar, starfsmenn og leikmenn og miklu skiptir að félagsandinn er góður. Ég vil þakka sérstaklega framkvæmdastjórn KFÍA, aðalstjórn og uppeldissviði fyrir frábært samstarf,“ segir Hulda. „Framundan er keppni í Inkasso deild karla og kvenna og það þarf að huga að mörgu í undirbúningi fyrir mótið. Norðurálsmótið, þar sem um 1500 keppendur í 7. flokki drengja leika knattspyrnu, mun einnig fara fram á Skaganum í byrjun júní nk., það er afar mikilvægt verkefni fyrir KFÍA. Þessum verkefnum mun ég sinna af krafti ásamt öðru sem fylgir framkvæmdastjórastarfinu,“ segir hún. Auk þess mun hún taka að sér tímabundið verkefni fyrir KSÍ vegna HM í Rússlandi í sumar. „Þar mun ég verða milliliður 365 miðla, KSÍ og Ölgerðarinnar með markaðssetningu á Pepsídeildinni, Inkasso deildinni og Mjólkurbikarnum. Það stefnir því í erilsamt sumar sem verður spennandi að takst á við,“ segir Hulda Birna að endingu.

Knattspyrnufélag ÍA þakkar Huldu í tilkynningunni fyrir vel unnin störf og óskar henni velfarnaðar í framtíðinni.

Líkar þetta

Fleiri fréttir