Skallagrímur tryggði sér í gærkvöld sæti í Domino‘s deild karla eftir sigur á Snæfelli í Borgarnesi, 118-87. Tvær umferðir eru eftir í deildinni en Borgnesingar hafa innsiglað toppsætið og þar með tryggt sér farseðilinn í deild þeirra bestu að nýju.

Bæði lið mættu vel stemmd til leiks. Leikmenn voru fullir sjálfstrausts og mikil stemning í húsinu. Mikið jafnræði var með liðunum. Skallagrímur komst þremur stigum yfir þegar fyrsti leikhluti var hálfnaður, 15-12 en Snæfell svaraði og tók sex stiga forskot, 15-21. Borgnesingar áttu hins vegar lokaorðið í leikhlutanum. Þeir komust yfir að nýju og leiddu með einu stigi eftir upphafsfjórðunginn, 28-27. Leikurinn var í framan af öðrum fjórðungi en eftir því sem leið á hann tók Skallagrímur að síga fram úr. Borgnesingar höfðu 14 stiga forskot í hálfleik, 64-50.

Skallagrímsmenn mættu gríðarlega ákveðnir til síðari hálfleiks. Þeir skoruðu 21 stig gegn aðeins fjórum stigum Snæfells á fyrstu fjórum mínútum síðari hálfleiks. Staðan allt í einu orðin 85-58. Snæfellingar áttu ekki svar við þessu áhlaupi Skallagríms. Borgnesingar héldu áfram að bæta við forskotið og gerðu endanlega út um leikinn í þriðja leikhluta. Staðan að honum loknum var 106-68. Snæfellingar náðu aðeins að klóra í bakkann í lokafjórðungnum en Skallagrímur sigraði að lokum með 31 stigi.

Eyjólfur með þrennu

Eyjólfur Ásberg Halldórsson setti upp enn eina þrennuna í vetur fyrir Skallagrím. Hann skoraði 22 stig, tók 14 fráköst og gaf tíu stoðsendingar, auk þess að stela boltanum fjórum sinnum. Aaron Parks var aftur á móti stigahæstur í liði Borgnesinga með 28 stig og tók tólf fráköst. Reynsluboltinn Darrell Flake skoraði 16 stig go gtók sex fráköst, Bjarni Guðmann Jónsson skoraði 16 stig einnig og Kristófer Gíslason var með 13 stig og fimm fráköst.

Christian Covile skoraði 20 stig fyrir Snæfell og tók ellefu fráköst. Viktor Marinó Alexandersson skoraði 18 stig, Nökkvi Már Nökkvason var með 14 og Geir Elías Úlfur Helgason skoraði tólf.

Borgnesingar á uppleið

Með sigrinum krækti Skallagrímur í 38. stigið í vetur og hafa átta stiga forskot á Hamar, Vestra og Breiðablik á toppi deildarinnar. Hins vegar eru ekki nægilega margir leikir eftir til að liðin geti gert atlögu að toppsætinu. Borgnesingar hafa því tryggt sér deildarmeistaratitilinn og munu lyfta bikarnum eftir lokaleik deildarinnar gegn Vestra í Borgarnesi 9. mars. En það sem mestu máli skiptir er að þeir hafa tryggt sér sæti í deild þeirra bestu á nýjan leik eftir stutt stopp í 1. deildinni.

Snæfellingar hafa tryggt sér fimmta sæti deildarinnar og þar með sæti í úrslitakeppninni um laust sæti í efstu deild. Þeir hafa 24 stig og sex stiga forskot á Fjölni í sætinu fyrir neðan. Fjölnir á hins vegar aðeins eftir að spila einn leik og geta því ekki gert atlögu að sæti Snæfells. Það ræðst síðan í lokaleikjum tímabilsins hvort Snæfell mætir Hamri, Vestra eða Breiðabliki í fyrstu umferð úrslitakeppninnar.

Skallagrímur kominn í deild þeirra bestu