Snæfellskonur þurftu að játa sig sigraðar gegn Íslandsmeisturum Keflavíkur í Domino‘s deild kvenna í körfuknattleik í gærkvöldi. Leikið var suður með sjó. Keflavíkurkonur höfðu yfirhöndina allan leikinn og sigruðu að lokum með 91 stigi gegn 70.

Keflavík byrjaði leikinn af krafti og náði snemma ágætis forskoti. Snæfell náði sér ekki almennilega á strik í fyrsta leikhluta og var tólf stigum á eftir að honum loknum, 29-17. Þá tók við góður kafli Snæfellskvenna, sem voru mun öflugra liðið í upphafi annars leikhluta. Þær skoruðu 14 stig gegn sex og minnkuðu muninn í 35-31 áður en leikhlutinn var hálfnaður. Keflavík tókst að auka forskotið á nýjan leik það sem eftir lifði fyrri hálfleiks og leiddi með tíu stigum í hléinu, 50-40.

Jafnræði var með liðunum í upphafi síðari hálfleiks. Þegar þriðji leikhluti var hálfnaður náði Keflavík snörpum kafla sem skilaði liðinu 19 stiga forskoti fyrir lokafjórðunginn, 72-53. Snæfell náði ekki að koma til baka í fjórða leikhluta og Keflavík hélt þægilegu forskoti allt til leiksloka. Lokatölur urðu 91-70, Keflavík í vil.

Kristen McCarthy var atkvæðamest í liði Snæfells með 24 stig, sjö fráköst og sex stolna bolta. Júlía Scheving Steindórsdóttir skoraði 16 stig og Andrea Björt Ólafsdóttir var með tíu.

Brittany Dinkins átti stórleik í liði Keflavíkur. Hún skoraði 40 stig, tók fimm fráköst og gaf fimm stoðsendingar. Birna Valgerður Benónýsdóttir skoraði 13 stig og tók níu fráköst og Thelma Dís Ágústsdóttir var með 13 stig og sex fráköst.

Snæfell situr eftir leikinn í sjöunda sæti deildarinnar með 18 stig, tveimur stigum á eftir næstu liðum fyrir ofan. Næst leikur Snæfell á laugardaginn, 3. mars næstkomandi, þegar liðið tekur á móti Skallagrími í Vesturlandsslag umferðarinnar.

Snæfell tapaði suður með sjó