Skallagrímur vann góðan sigur á botnliði Njarðvíkur, 91-66, þegar liðin mættust í Domino‘s deild kvenna í gærkvöldi. Leikið var í Borgarnesi.

Mikið jafnræði var með liðunum í upphafi leiks og þau fylgdust að meira og minna allan fyrsta leikhluta. Skallagrímur átti þó lokaorðið og hafði þriggja stiga forskot að honum loknum, 23-20. Næstu mínútur fylgdust liðin að. Njarðvík jafnaði og komst yfir þegar annar leikhluti var hálfnaður, 28-31. Skallagrímskonur tóku forystuna að nýju í næstu sóknum og náðu góðri rispu undir lok fyrri hálfleiks. Skilaði það þeim sjö stiga forystu í hléinu, 46-39.

Skallagrímur byrjaði síðari hálfleikinn af krafti og komst ellefu stigum yfir en Njarðvík svaraði og minnkaði muninn í sex stig að nýju. Skallagrímur náði þá aftur yfirhöndinni og náði tólf stiga forskoti þegar lítið var eftir af þriðja. Góð rispa Njarðvíkur í blálok leikhlutans gerði það hins vegar að verkum að forysta Skallagríms var ekki meiri en sjö stig fyrir lokafjórðunginn, 58-51. Það var síðan um miðjan fjórða leikhluta sem Skallagrímskonum tókst að gera endanlega út um leikinn. Með snörpum og góðum leikkafla náðu þær 20 stiga forskoti og eftir það varð ekki aftur snúið. Þær bættu lítillega við forskotið það sem eftir lifði leiks og sigruðu að lokum með 25 stigum, 91-66.

Carmen Tyson-Thomas átti stórleik á báðum endum vallarins . Hún skoraði 34 stig, reif niður 17 fráköst, gaf átta stoðsendingar, stal boltanum sex sinnum og varði tvö skot. Sigrún Sjöfn Ámundadóttir skoraði 23 stig, tók tíu fráköst og gaf sjö stoðsendingar, Jeanne Lois Figueroa Sicat skoraði tólf stig og Bríet Lilja Sigurðardóttir tíu.

Shalonda R. Winton skoraði 25 stig fyrir gestina og reif niður 25 fráköst og Ína María Einarsdóttir skoraði 13 stig.

Með sigrinum krækti Skallagrímur í mikilvæg stig í baráttunni um sæti í úrslitakeppninni um Íslandsmeistaratitilinn í vor. Liðið situr í fimmta sæti með 20 stig, tveimur stigum á eftir Stjörnunni í fjórða sætinu og þar með sæti í úrslitakeppninni. Næst leikur Skallagrímur á laugardag, 3. mars, þegar liðið mætir Snæfelli í Vesturlandsslag í Stykkishólmi.

Skallagrímur nálgast sæti í úrslitakeppninni