Snæfell vann öruggan sigur á ÍA, 108-80, þegar liðin mættust í 1. deild karla í körfuknattleik í gærdag. Leikið var í Stykkishólmi.

Snæfell hóf leikinn af krafti og komst í 14-5 þegar upphafsfjórðungurinn var hálfnaður. Skagamenn minnkuðu muninn í 17-10 en Snæfell svaraði með góðum kafla og leiddi 28-14 að loknum fyrsta leikhluta. Skagamenn héldu í við Hólmara stærstan hluta annars leikhluta. Snæfell hafði áfram þægilega forystu en hún óx ekki að ráði fram að hléinu. Heimamenn leiddu með 18 stigum í hálfleik, 55-37.

Framan af síðari hálfleik náðu Skagamenn að kroppa örfá stig af forystu Snæfells. Það var síða undir lok þriðja leikhluta að Snæfellingar áttu góða rispu og náðu 22 stiga forskoti lokafjórðunginn. Þar komst Snæfell mest 31 stigi yfir um miðjan fjórðunginn og vann að lokum örugglega, 108-80.

Christian Covile átti stórleik fyrir Snæfell, skoraði 38 stig og tók tólf fráköst. Geir Elías Úlfur Helgason var með 20 stig, sex fráköst og fimm stoðsendingar en aðrir komust ekki í tveggja stafa tölu á stigatöflunni.

Í liði ÍA var Marcus Dewberry langstigahæstur með rúman helming stiga Skagamanna. Hann skoraði 42 stig og tók fimm fráköst. Sindri Leví Ingason skoraði 13 stig og tók fimm fráköst en aðrir höfðu minna.

Snæfell er í fimmta sæti deildarinnar með 24 stig og stendur vel að vígi í baráttunni um sæti í úrslitakeppninni. Sex stig eru í næsta lið fyrir neðan sem Snæfell þarf að halda fyrir neðan sig það sem eftir lifir deildarkeppninni. Skagamenn verma hins vegar botnsæti deildarinnar og eru án stiga enn sem komið er.

Næst leikur Snæfell fimmtudaginn 1. mars þegar liðið mætir Skallagrími í Vesturlandsslag í Borgarnesi. Skagamenn taka hins vegar á móti Breiðabliki föstudaginn 2. mars.

Snæfell sigraði Vesturlandsslaginn örugglega