Snæfell tapaði fyrir Val, 60-79, í kaflaskiptum leik í Domino‘s deild kvenna í körfuknattleik. Leikið var í Stykkishólmi í gær.

Valur hafði heldur yfirhöndina í upphafi leiks en Snæfellskonur fylgdu gestunum eins og skugginn. Þegar fyrsti leikhluti var rúmlega hálfnaður leiddi Valur með einu stigi, 10-11. Gestirnir náðu síðan smá rispu undir lok leikhlutans og náðu fimm stiga forskoti áður en hann var úti, 14-19. Snæfell minnkaði muninn í eitt stig snemma í öðrum en þá tók við góður leikkafli Valskvenna. Þær náðu mest tólf stiga forskoti seint í leikhlutanum áður en Snæfell minnkaði muninn í átta stig áður en hálfleiksflautan gall, 27-35.

Snæfellskonur mættu ákveðnar til síðari hálfleiks. Þær minnkuðu forskot gestanna jafnt og þétt og komust yfir þegar þriðji leikhluti var rúmlega hálfnaður, 41-40. Valur tók þá forystuna að nýju og leiddi með þremur stigum fyrir lokafjórðunginn, 45-48. Snemma í fjórða leikhluta urðu síðan þáttaskil í leiknum. Með snörpum leikkafla náði Valur að breyta stöðunni úr 47-53 í 52-66 og slíta sig frá Snæfelli. Gestirnir leiddu nokkuð þægilega allt til leiksloka og unnu að lokum 19 stiga sigur, 60-79.

Kristen McCarthy var atkvæðamest í liði Snæfells með 27 stig, 15 fráköst, fimm stoðsendingar og fjóra stolna bolta. Berglind Gunnarsdóttir var með 16 stig, fimm fráköst og fimm stoðsendingar en aðrar höfðu minna.

Aalyah Whiteside fór fyrir liði Vals. Hún skoraði 30 stig og reif niður 22 fráköst. Hallveig Jónsdóttir var með 15 stig og fimm fráköst og Bergþóra Holton Tómasdóttir skoraði 14 stig.

Snæfell situr í sjötta sæti deildarinnar með 16 stig, jafn mörg og Skallagrímur í sætinu fyrir ofan og Breiðablik í sætinu fyrir neðan. Snæfell mætir einmitt Breiðabliki í næstu umferð. Liðin mætast í Kópavogi á laugardaginn, 24. febrúar.

Snæfell tapaði heima gegn Val