ÍA tók á móti Skallagrími í Vesturlandsslag 1. deildar karla í körfuknattleik í gær. Eftir jafnan fyrri hálfleik tók Skallagrímur öll völd á vellinum í þeim síðari og sigraði að lokum örugglega, 81-115.

Skagamenn voru sterkara lið vallarins í upphafi leiks en Borgnesingum gekk illa að finna taktinn. ÍA hafði tíu stiga forskot, 19-9, um miðjan fyrsta leikhluta en þá tók Skallagrímsliðið við sér. Með snörpum leikkafla tókst Borgnesingum að minnka muninn í eitt stig áður en upphafsfjórðungurinn var úti, 22-21. Skallagrímur komst síðan fimm stigum yfir snemma í öðrum leikhluta en ÍA átti þá góðan kafla og komst sömuleiðis fimm stigum yfir. En forystunni héldu þeir ekki lengi. Skallagrímur lauk fyrri hálfleik af miklum krafti og hafði ellefu stiga forystu í hléinu, 46-57.

Það var síðan í þriðja leikhluta sem Skallagrímur tók öll völd á vellinum. Þær bættu vel við forskot sitt og það hratt. Þeim tókst reyndar ekki að skora stig síðustu fjórar mínúturnar í leikhlutanum. Engu að síður höfðu þeir 26 stiga forskot fyrir lokafjórðunginn, 58-84, því Skagamenn skoruðu aðeins tólf stig allan leikhlutann. Úrslit leiksins voru ráðin og Skallagrímur hélt forskoti sínu að kalla óbreyttu þar til í blálokin að þeir bættu aðeins við. Lokatölur urðu 81-115 fyrir Skallagrími.

Marcus Dewberry átti sannkallaðan stórleik fyrir ÍA, skoraði 42 stig og gtók átta fráköst. Sigurður Rúnar Sigurðsson skoraði ellefu stig en aðrir leikmenn ÍA komust ekki í tveggja stafa tölu á stigatöflunni.

Aaron Parks var stigahæstur Skallagríms með 35 stig, Eyjólfur Ásberg Halldórsson var með 22 og tíu fráköst, Hjalti Ásberg Þorleifsson 15 stig, Kristófer Gíslason 14 stig, ellefu fráköst og sjö stoðsendingar og Bjarni Guðmann Jónsson tólf stig og sjö fráköst.

Staða liðanna í deildinni er þannig að Skallagrímur trónir á toppnum með 34 stig, fjórum stigum á undan Breiðabliki í sætinu fyrir neðan. Skagamenn eru á hinum endanum, sitja án stiga í botnsæti deildarinnar.

Bæði lið leika næst sunnudaginn 25. febrúar næstkomandi. Skagamenn halda í Hólminn og mæta Snæfelli í Vesturlandsslag umferðarinnar en Skallagrímur sækir Gnúpverja heim.

Skallagrímur stakk ÍA af í síðari hálfleik