Snæfell tapaði naumlega á heimavelli gegn FSu, 100-101, þegar liðin mættust í 1. deild karla í körfuknattleik í gær.

Mikið jafnræði var með liðunum allan fyrri hálfleikinn. Liðin skiptust á að skora á upphafsmínútum leiksins en eftir það leiddu gestirnir með tveimur stigum. Snæfell komst síðan yfir seint í leikhlutanum áður en FSu jafnaði í 27-27 og þannig var staðan eftir upphafsfjórðunginn. Áfram fylgdust liðin að í öðrum fjórðungi. Hverri körfu var svarað og staðan var jöfn þegar hann var hálfnaður, 35-35. Þá náðu gestirnir heldur yfirhöndinni og leiddu með fjórum stigum í hléinu, 48-52,

Snæfell minnkaði muninn í eitt stig snemma í síðari hálfleik en eftir það lék FSu betur og náðu ellefu stiga forystu fyrir lokafjórðunginn, 65-76. Það var síðan ekki fyrr en á síðustu mínútum leiksins að Snæfell náði að gera alögu að forskoti gestanna. Þeir minnkuðu muninn í fjögur stig þegar tvær mínútur voru eftir og áttu eftir að gera leikinn enn meira spennandi. Snæfell komst yfir af vítalínunni þegar 15 sekúndur lifðu leiks. Gestirnir fóru í sókn, hittu ekki en náðu frákastinu og skoruðu. Staðan 100-101 og aðeins tvær sekúndur á klukkunni. Það var nógur tími til að Snæfell næði að láta skot ríða af en það geigaði. FSu fór því með sigur af Hólmi.

Christian Covile skoraði 19 stig, tók sex fráköst og gaf fimm stoðsendingar í liði Snæfells. Viktor Marinó Alexandersson og Þorbergur Helgi Sæþórsson voru jafnir honum að stigum, með 19 einnig. Sveinn Arnar Davíðsson var með 15 stig og átta fráköst og þeir Geir Elías Úlfur Helgason og Nökkivi Már Nökkvason skoruðu tíu stig hvor.

Antowine Lamb skoraði 30 stig fyrir gestina og tók fimm fráköst, Ari Gylfason var með 25 stig, sex fráköst og fimm stoðsendingar, Hlynur Hreinsson 17 stig og sex stoðsendingar og Florijan Jovanov 15 stig, sjö fráköst og átta stoðsendingar.

Snæfell situr í fimmta sæti deildarinnar með 18 stig eftir 18 leiki, tveimur stigum á undan Fjölni í sætinu fyrir neðan. Þessi tvö lið mætast í næstu umferð deildarinnar. Leikur þeirra fer fram í Grafarvogi á föstudaginn, 9. febrúar næstkomandi.

Naumt tap Snæfells gegn FSu