Skallagrímur vann góðan heimasigur á Breiðabliki, 66-57, þegar liðin mættust í Domino‘s deild kvenna í körfuknattleik í gær. Skallagrímskonur tóku öll völd á vellinum snemma leiks og tilraunir gestanna til að fá eitthvað fyrir sinn snúð báru engan árangur.

Skallagrímur byrjuðu leikinn af krafti og komust í 12-4 seint í fyrsta leikhluta. En gestirnir luku fjórðungnum af krafti og minnkuðu muninn í 14-10. Skallagrímsliðið herti tökin í vörninni í öðrum fjórðungi og spilamennska liðsins einkenndist af mikilli leikgleði. Lið spila jafnan vel þegar leikmönnunum líður vel inni á vellinum. Fyrir vikið höfðu Skallagrímskonur ágætis tök á leiknum, bættu við forskot sitt og leiddu með níu stigum í hálfleik, 32-23.

Skallagrímur náði góðum spretti í upphafi fyrri hálfleiks og 17 stiga forskoti, 48-31 um miðjan þriðja leikhluta. Breiðablik skipti yfir í svæðisvörn, náði 0-14 leikkafla og forskot Skallagríms skrapp saman niður í þrjú stig fyrir lokafjórðunginn, 48-45. Skallagrímskonur byrjuðu fjórða leikhluta af miklum krafti og náðu 13 stiga forskoti um miðbik hans. Blikakonur náðu aðeins að klóra í bakkann undir lokin en voru aldrei líklegar til að stela sigrinum á lokamínútunum. Skallagrímur sigraði með níu stigum, 66-57.

Carmen Tyson-Thomas átti stórleik í liði Skallagríms. Hún skoraði 41 af 66 stigum liðsins og tók tólf fráköst að auki. Næst henni var Bríet Lilja Sigurðardóttir með níu stig og níu fráköst og þá Sigrún Sjöfn Ámundadóttir með fimm stig, níu fráköst og sex stoðsendingar.

Whitney Kiera Wright var atkvæðamest í liði Breiðabliks með 33 stig og 14 fráköst en aðrar höfðu minna.

Skallagrímur hefur 16 stig í fimmta sæti deildarinnar og tókst með sigrinum að lyfta sér upp fyrir Breiðablik, en liðin eru jöfn að stigum. Næst leikur Skallagrímur á laugardaginn, 3. febrúar, þegar liðið heimsækir Keflavík.

Carmen fór á kostum í sigri Skallagríms