Snæfell bar siguorð af botnliði Njarðvíkur, 70-73, þegar liðin mættust í Domino‘s deild kvenna í gær. Eftir spennandi leik var jafnt eftir venjulegan leiktíma og þurfti að grípa til framlengingar. Þar réðust úrslitin ekki fyrr en á lokasekúndunum og Snæfellskonur komu því í veg fyrir fyrsta sigur Njarðvíkur í deildinni í vetur.

Snæfellskonur höfðu yfirhöndina framan af fyrsta leikhluta og leiddu 6-12 þegar hann var rúmlega hálfnaður. Þá tók Njarðvíkurliðið við sér og náði að jafna metin í 16-16 áður en upphafsfjórðungurinn. Snæfell komst aftur yfir í öðrum leikhluta og hafði nokkurra stiga forskot þar til stutt var eftir af fyrri hálfleik. Þá náði Njarðvík góðum leikkafla, náði forystunni og leiddi með fimm stigum í hléinu, 38-33.

Liðin áttu erfitt með að finna taktinn í þriðja leikhluta. Snæfell skoraði aðeins átta stig allan leikhlutann gegn ellefu stigum Njarðvíkur. Fyrir vikið hafði Njarðvík átta stiga forskot fyrir lokafjórðunginn, 49-41. Snæfell minnkaði muninn í fimm stig snemma í fjórða leikhluta en komust ekki nær að sinni. Það var síðan undir lok venjulegs leiktíma að Snæfell komst einu stigi yfir. Njarðvíkurkonur svöruðu í sömu mynt og fengu villu að auki og komust í 61-59 með 27 sekúndur á klukkunni. Snæfell stillti upp í langa sókn og jafnaði metin í 61-61 þegar sex sekúndur lifðu leiks. Njarðvík reyndi síðan skot sem geigaði og því þurfti að framlengja.

Leikurinn var í járnum í framlengingunni þar sem hverri körfu var svarað. Njarðvík komst stigi yfir, 69-68, þegar rúmar 40 sekúndur voru eftir. Snæfell svaraði með þriggja stiga körfu og komst tveimur stigum yfir. Njarðvík misnotaði víti á ögurstundu og náði því aðeins að minnka muninn í eitt stig þegar átta sekúndur lifðu leiks. Því var ekki um annað að ræða en að brjóta og senda Snæfell á vítalínuna. Bæði vítin fóru niður og Njarðvík hitti ekki úr þriggja stiga skoti til að jafna metin í þann mund sem flautan gall. Snæfell sigraði með 73 stigum gegn 70.

Kristen McCarthy var atkvæðamest í liði Snæfells með 25 stig, 15 fráköst, fimm stolna bolta og fjögur varin skot. Gunnhildur Gunnarsdóttir var með ellefu stig og níu fráköst og Andrea Björt Ólafsdóttir tíu stig og sjö fráköst.

Shalonda Winton skoraði 27 stig fyrir Njarðvík, tók 18 fráköst og gaf átta stoðsendingar. Björk Gunnarsdóttir var með ellefu stig og sjö fráköst og Ína María Einarsdóttir skoraði ellefu stig sömuleiðis.

Snæfell situr eftir leikinn í sjöunda sæti deildarinnar með 14 stig og hefur jafnað stigafjölda Skallagríms í sætinu fyrir ofan. Þar fyrir ofan er Breiðablik með tveggja stiga forskot á Vesturlandsliðin. Næsti leikur Snæfells er gegn Stjörnunni. Fer hann fram í Stykkishólmi á laugardaginn, 3. febrúar næstkomandi klukkan 16:30.

Snæfell sigraði Njarðvík eftir framlengingu