Skallagrímur mátti sætta sig við tap gegn Val, 77-73, eftir æsispennandi lokamínútur þegar liðin mættust í Domino‘s deild kvenna í gær. Leikið var á Hlíðarenda í Reykjavík.

Valskonur byrjaði leikinn af miklum krafti en Skallagrímskonur áttu erfitt uppdráttar. Þegar fyrsti leikhluti var hálfnaður leiddi Valur 15-4. En þá tók Skallagrímur við sér og náði að minnka muninn í þrjú stig áður en leikhlutinn var úti, 23-20. Mikið jafnræði var með liðunum framan af öðrum fjórðungi. Skallagrímskonur jöfnuðu metinn í tvígang og komust síðan yfir. Leikur þeirra var góður undir lok fyrri hálfleiks og þær leiddu með tíu stigum í hléinu, 43-33.

Skallagrímskonur voru sterkari framan af þriðja leikhluta. En eftir það kom Valur sér aftur inn í leikinn og hafði minnkað forystu Skallagríms í fimm stig fyrir lokafjórðunginn. Upphófust þá æsispennadi lokamínútur. Valur jafnaði metin en Skallagrímur tók forystuna að nýju. Liðin skiptust síðan á að leiða en staðan var jöfn þegar mínúta lifði leiks. Valur skoraði næstu körfu og Skallagrímur brenndi af skoti í næstu sókn. Skallagrímskonur náðu frákasti með fimm sekúndur á klukkunni en Valskonur stálu boltanum aftur. Þær tóku leikhlé, stilltu upp í kerfi og innsigluðu sigurinn með sniðskoti á lokasekúndunum, 77-73.

Carmen Tyson-Thomas átti stórleik fyrir Skallagrím, skoraði 32 stig, reif niður 17 fráköst, gaf sex stoðsendingar og varði fimm skot. Jóhanna Björk Sveinsdóttir skoraði ellefu stig, tók tíu fráköst og varði hvorki fleiri né færri en átta skot. Sigrún Sjöfn Ámundadóttir skoraði tíu stig, tók sex fráköst og gaf fimm stoðsendingar.

Aalyah Whiteside var í sérflokki í liði Vals með 35 stig, tólf fráköst og sex varin skot. Guðbjörg Sverrisdóttir kom henni næst með tíu stig og ellefu stoðsendingar.

Skallagrímur situr í sjötta sæti deildarinnar með 14 stig, með tveggja stiga forskot á Snæfell en tveimur stigum á eftir Breiðabliki. Síðarnefnda liðið er einmitt næsti andstæðingur Borgarnesliðsins. Skallagrímur og Breiðablik mætast í Borgarnesi miðvikudaginn 31. janúar næstkomandi.

Skallagrímskonur misstu af sigrinum