Snæfell tók á móti Skallagrími í Vesturlandsslag 1. deildar karla í körfuknattleik í gærkvöldi. Eftir hnífjafnan síðari hálfleik og spennandi lokafjórðung voru það Borgnesingar sem fóru með sigur af hólmi, 95-100.

Snæfell hafði heldur yfirhöndina í upphafi leiks. Hólmarar leiddu 15-10 eftir fimm mínútna leik og 24-19 seint í fyrsta leikhluta. En Skallagrímur kláraði leikhlutann af krafti og jafnaði metin. Staðan var 27-27 að loknum fyrsta fjórðungi. Skallagrímur komst sex stigum yfir snemma í öðrum leikhluta og stjórnaði ferðinni allt til hálfleiks. Borgnesingar bættu enn við forskotið á lokaspretti fyrri hálfleiks og höfðu tíu stiga forskot í hléinu, 37-47.

Snæfellsliðið mætti ákveðið til síðari hálfleiks og minnkaði forskot Skallagríms smám saman eftir því sem leið á þriðja leikhluta. Þegar sjö mínútur höfðu verið leiknar af síðari hálfleik voru Snæfellingar búnir að jafna og eftir það var leikurinn í járnum. Snæfell leiddi 70-67 fyrir lokafjórðunginn. Skallagrímur komst fimm stigum yfir snemma í fjórða, 72-77 áður en Snæfell jafnaði í 83-83 um miðjan leikhlutann. Skallagrímur skoraði næstu stig, náðu að halda Snæfelli í skefjum á lokamínútunum og hafði að lokum sigur, 95-100.

Christian Covile var atkvæðamestur í liði heimamanna. Hann skoraði 31 stig og reif niður 19 fráköst. Viktor Marinó Alexandersson skoraði 17 stig og gaf sjö stoðsendingar og Geir Elías Úlfur Helgason var með 17 stig einnig.

Aaron Parks var stigahæstur í liði Skallagríms með 22 stig og gaf hann fimm stoðsendingar að auki. Bjarni Guðmann Jónsson skoraði 22 stig og tók 12 fráköst og Eyjólfur Ásberg Halldórsson var með 19 stig, ellefu fráköst og átta stoðsendingar.

Staða liðanna í deildinni er á þá leið að Skallagrímur trónir á toppnum með 24 stig, tveimur stigum fyrir ofan Breiðablik. Snæfell er í fjórða sæti með 18 stig, tveimur stigum á eftir Hamri og jafn mörg stig og Vestri en hefur leikið einum leik fleira.

Næst leikur Skallagrímur á fimmtudaginn, 18. janúar, í toppslag gegn Breiðabliki í Borgarnesi. Snæfell leikur hins vegar á sunnudaginn, 21. janúar, þegar liðið tekur á móti Gnúpverjum.

Skallagrímur sótti sigur í Stykkishólm