Skallagrímskonur urðu að játa sig sigraðar gegn Haukum, 84-63, í síðasta leik Domino‘s deildar kvenna fyrir jólafrí. Leikið var á Ásvöllum í Hafnarfirði á laugardag.

Mikið jafnræði var með liðunum í upphafi leiks og liðin skiptust á að skora. Skallagrímur leiddi með einu stigi þegar upphafsfjórðungurinn var hálfnaður en eftir það komust Haukakonur í gírinn. Þær náðu yfirhöndinni í leiknum og með góðum kafla náðu þær sjö stiga forskoti áður en fyrsti leikhluti var úti, 24-17. Haukar tóku síðan öll völd á vellinum í öðrum leikhluta. Liðið jók forskot sitt snarlega í 14 stig og hélt þeirri forystu meira og minna óbreyttri til hálfleiks. Staðan í hléinu var 46-30, Haukum í vil og liðið í vænlegri stöðu fyrir síðari hálfleik.

Hægt og sígandi náði Skallagrímur að minnka muninn í tíu stig, 63-53, seint í þriðja leikhluta. En Haukar áttu lokaorðið í leikhlutanum og náðu 16 stiga forskoti á nýjan leik fyrir lokafjórðunginn, 69-53. Haukar réðu lögum og lofum á vellinum allt til leiksloka og sigruðu að lokum örugglega, 84-63.

Carmen Tyson-Thomas var atkvæðamest í liði Skallagríms með 33 stig, 17 fráköst og fimm varin skot. Jóhanna Björk Sveinsdóttir skoraði 18 stig og tók níu fráköst en aðrir leikmenn Skallagríms náðu sér ekki á strik í leiknum.

Helena Sverrisdóttir setti upp myndarlega þrennu í liði Hauka, skoraði 23 stig, tók 16 fráköst og gaf 15 stoðsendingar. Þóra Kristín Jónsdóttir skoraði 18 stig, tók sjö fráköst og gaf fimm stoðsendingar og Cherise Michelle Daniel skoraði 17 stig og tók tólf fráköst.

Skallagrímskonur sitja í sjötta sæti deildarinnar með tólf stig, fjórum stigum á eftir næstu liðum fyrir ofan. Næst leikur Skallagrímur á nýju ári, 6. janúar næstkomandi þegar liðið heimsækir Njarðvík.

Skallagrímskonur lágu gegn Haukum