Snæfell mátti sætta sig við tap, 88-73, þegar liðið heimsótti topplið Vals í Domino‘s deild kvenna í körfuknattleik í gær.

Jafnt var á með liðunum fyrstu mínúturnar en snemma leiks náðu Valskonur yfirhöndinni. Snæfell var þó ekki langt undan og voru aðeins fjórum stigum á eftir Val eftir fyrsta leikhluta, 21-17. Snæfellskonur stigu á bensínið í öðrum leikhluta og gáfu toppliðinu ekki tommu eftir. Valsliðið hafði þó áfram forystu en Snæfell fylgdi þeim eins og skugginn svo aldrei munaði nema tveimur til þremur stigum þar til undir lok leikhlutans. Þá náði Valur smá rispu og hafði sjö stiga forystu í hlénu, 43-36.

Valsliðið fór að sækja í sig veðrið eftir hléið og náði 14 stiga forskoti eftir miðjan þriðja leikhluta, 56-42. Þá komu Snæfellskonur til baka og minnkuðu muninn í átta stig áður en leikhlutinn var úti, 65-57. Snæfell reyndi að gera atlögu að forystunni í upphafi lokafjórðungsins en varð lítt ágengt. Aftur náðu þær góðri rispu um miðjan leikhlutann en heimaliðið stóð atlöguna af sér. Eftir það jók Valur forskot sitt jafnt og þétt það sem eftir lifði leiks og vann að lokum 15 stiga sigur, 88-73.

Berglind Gunnarsdóttir var stigahæst leikmanna Snæfells með 26 stig, fimm varin skot, fjögur fráköst og fjórar stoðsendingar. Kristen McCarthy kom henni næst með 21 stig, 16 fráköst, átta stoðsendingar og fimm stolna bolta.

Fimm leikmenn Vals komust í tveggja stafa tölu á stigatöflunni. Atkvæðamest þeirra var Alexandra Petersen með 22 stig, sjö fráköst og sjö stoðsendingar.

Snæfell situr í sjöunda og næstneðsta sæti deildarinnar með tíu stig, tveimur stigum á eftir Skallagrími í sætinu fyrir ofan en langt á undan stigalausu botnliði Njarðvíkur. Næst leikur Snæfell á laugardaginn, 16. desember, þegar liðið mætir Breiðabliki í Stykkishólmi.

Snæfell tapaði fyrir toppliði Vals