Leikið var í átta liða úrslitum Maltbikars kvenna í körfuknattleik í gær. Skallagrímur valtaði yfir 1. deildar lið ÍR í Borgarnesi, 92-47, en Snæfell lagði Val í æsispennandi og dramatískum leik í Stykkishólmi, 75-73. Bæði Skallagrímur og Snæfell hafa þar með tryggt sér farseðilinn í Laugardalshöllina, þar sem undanúrslitin fara fram. Dregið verður í undanúrslitum á morgun, þriðjudaginn 12. desember og þar kemur í ljós hverjir mótherjar Vesturlandsliðanna verða. Farið gæti svo að Snæfell og Skallagrímur endurtaki leikinn frá því á síðasta ári, en þá mættust liðin einmitt í mögnuðum undanúrslitaleik í Laugardalshöll.

Miklir yfirburðir Skallagríms

Leikur Skallagríms og ÍR var ekki jafn nema fyrstu mínúturnar. Leikurinn fór hægt af stað og staðan var ekki nema 6-4 þegar upphafsfjórðungurinn var hálfnaður. Eftir það settu Skallagrímskonur í fluggírinn og sýndu hvers vegna þær eru deild ofar en gestirnir. Þær leiddu 24-7 að loknum fyrsta leikhluta og litu aldrei til baka. ÍR náði að minnka muninn í tólf stig um miðjan annan fjórðung en nær komust þær ekki það sem eftir lifði leiks. Skallagrímskonur bættu jafnt og þétt við forskot sitt allt til leikskloka. Þær höfðu 31 stigs forskot að loknum þremur leikhlutum og 45 stiga forskot þegar lokaflautan gall, 92-47.

Carmen Tyson Thomas átti stórleik fyrir Skallagrím, skoraði 34 stig, tók 15 fráköst og gaf fimm stoðsendingar. Jóhanna Björk Sveinsdóttir var með tólf stig og sjö fráköst, Heiðrún Harpa Ríkharðsdóttir tíu stig og átta fráköst og Gunnhildur Lind Hansdóttir skoraði tíu stig einnig.

Dramatík í Hólminum

Það vantaði ekki dramatíkina í leik Snæfells og Vals í Stykkishólmi. Leikurinn var í járnum frá fyrstu mínútu og jafnt eftir upphafsfjórðunginn, 21-21. Valur tók smá rispu í upphafi annars leikhluta en það sama gerði Snæfell í lok fjórðungsins og staðan 41-29 fyrir Snæfelli í hálfleik. Snæfell hafði síðan undirtökin framan af þriðja leikhluta og leiddi með sjö stigum um hann miðjan. Þá náði Valsliðið góðum kafla og náði forystu fyrir lokafjórðunginn, 57-59. Valur byrjaði betur og komst fimm stigum yfir en um miðjan leikhlutann jafnaði Snæfell í 67-67. Liðin fylgdust að næstu mínúturnar, hverri körfu var svarað og spennustigið hækkaði jafnt og þétt. Þegar hálf mínúta lifði leiks var staðan enn jöfn, 71-71 og rafmagnað andrúmsloft í íþróttahúsinu í Stykkishólmi. Valsliðið hélt í sókn en Snæfellskonur stukku á boltann og uppkast dæmt. Örin vísaði á Snæfell og fengu þær því boltann og fóru af stað í lokasókn leiksins þegar 22 sekúndur voru eftir á klukkunni. Kristen McCarthy sendi boltann á Berglindi Gunnarsdóttur sem tók erfitt skot frá endalínu sem geigaði. En eftir mikinn atgang og baráttu í teignum barst boltinn aftur á Berglindi. Hún náði skoti sem rataði ofan í um leið og lokaflautan gall og tryggði Snæfelli þar með sæti í undanúrslitum.

Kristen McCarthy skoraði 26 stig fyrir Snæfell og tók sjö fráköst. Rebekka Rán Karlsdóttir var með 15 stig og fimm fráköst og Berglind Gunnarsdóttir skoraði ellefu stig, gaf átta stoðsendingar og tók sjö fráköst.

: Carmen Tyson-Thomas átti stórleik í auðveldum sigri Skallagríms á 1. deildar liði ÍR. Ljósm. Kvennakarfa Skallagríms.

Bæði Vesturlandsliðin í undanúrslit