ÍA tók á móti Gnúpverjum í 1. deild karla í körfuknattleik að kvöldi föstudags. Skemmst er frá því að segja að Skagamenn virkuðu hálf andlausir í leiknum og það kann ekki góðri lukku að stýra. Gnúpverjar stjórnuðu frá upphafi til enda og unnu stórt, 76-100.

Gestirnir skoruðu fyrstu stigin en eftir þriggja mínútna leik komst ÍA yfir, 10-8 og var það í fyrsta og síðasta skiptið sem Skagamenn leiddu í leiknum. Gnúpverjar náðu forystunni að nýju og tólf stiga forskoti með góðri rispu seint í upphafsfjórðungnum, 19-31. Gestirnir höfðu áfram undirtökin í öðrum leikhluta og Skagamenn náðu ekki að minnka forskotið. Þvert á móti juku gestirnir að sunnan forskot sitt lítið eitt og leiddu með 15 stigum í hálfleik, 40-55.

Skagamenn virtust örlítið sprækari í upphafi síðari hálfleik og minnkuðu muninn í tíu stig áður en þriðji leikhluti var hálfnaður. En eftir það datt leikurinn í sama farið og fyrir hlé, Gnúpverjar voru mun sterkari og höfðu 19 stiga forskot fyrir lokafjórðunginn, 64-83. Skagamenn veittu þeim litla mótspyrnu í fjórða leikhluta, gestirnir bættu nokkrum stigum til viðbótar við forskotið og unnu að lokum stórsigur, 76-100.

Marcus Dewberry átti stórleik og skoraði helming stiga ÍA, eða 38 stig. Hann gaf að auki sjö stoðsendingar, stal sjö boltum og tók fimm fráköst. Andri Jökulsson skoraði 15 stig og tók fimm fráköst en aðrir leikmenn ÍA náðu sér engan veginn á strik.

Everage Lee Richardsson átti risaleik í liði gestanna og var hársbreidd frá því að setja upp tröllaþrennu. Hann skoraði 43 stig, reif niður 18 fráköst og gaf níu stoðsendingar, auk þess sem hann stal fjórum boltum. Atli Örn Gunnarsson kom honum næstur með 24 stig og sjö fráköst en aðrir höfðu minna.

Skagamenn sitja sem fyrr einir á botni deildarinnar án stiga þegar einn leikur er eftir fram að jólum. Sá leikur er Vesturlandsslagur á móti Skallagrími í Borgarnesi föstudaginn 15. desember næstkomandi.

Andlausir Skagamenn lágu fyrir Gnúpverjum