Snæfell vann góðan útisigur á liði FSu, 98-102, í 1. deild karla í körfuknattleik í gærkvöldi. Selfyssingar höfðu undirtökin lungann úr leiknum en Snæfell náði forystunni í fjórða leikhluta og náði að hrifsa til sín sigurinn eftir æsispennandi lokamínútur.

Heimamenn voru heldur sprækari í fyrsta leikhluta. Gott flæði var í sóknarleik þeirra og þeir höfðu fimm stiga forskot eftir upphafsfjórðunginn, 26-21. Snæfellingar mættu ákveðnir til annars leikhluta og innan skamms voru þeir komnir upp að hlið heimamanna á stigatöflunni. En lið FSu náði undirtökunum að nýju, náði nokkurra stiga forystu og hélt henni allt þar til hálfleiksflautan gall. Þá leiddu heimamenn með átta stigum, 59-51.

Snæfellingar voru mun ákveðnari í upphafi síðari hálfleiks. Um miðjan þriðja leikhluta höfðu þeir minnkað muninn niður í eitt stig, 71-70. En þá tóku heimamenn smá rispu sem nægði til að skila þeim átta stiga forskoti fyrir lokafjórðunginn, 84-76. En Snæfellingar voru hvergi nærri hættir. Þeir settu fyrstu níu stigin í fjórða leikhluta og komust yfir, 85-84. Leikurinn var æsispennandi það sem eftir lifði. Heimamenn jöfnuðu í 87-87 þegar leikhlutinn var hálfnaður og liðin gengu í takt næstu mínúturnar þar sem hverri körfu var svarað. Heimamenn náðu loks að komast yfir, 94-92, þegar tvær mínútur lifðu leiks. Snæfell steig hins vegar ekki feilspor það sem eftir lifði leiks og munaði þar miklu um frábæran leik Christian Covile. Með hann í broddi fylkingar komst Snæfell yfir, 98-99 þegar innan við mínúta var eftir á klukkunni. Gestirnir hittu ekki úr næstu skotum sínum og Snæfell kláraði leikinn, 98-102.

Fyrrnefndur Christian Covile far frábær í liði Snæfells, skoraði 37 stig og tók 13 fráköst. Nökkvi Már Nökkvason skoraði 16 stig, Viktor Marinó Alexandersson var með tólf stig og sex stoðsendingar og Þorbergur Helgi Sæþórsson skoraði ellefu stig.

Ari Gylfason var atkvæðamestur í liði heimamanna með 30 stig, sex stoðsendingar og fimm fráköst en Hlynur Hreinsson kom honum næstur með 20 stig.

Snæfell situr í þriðja sæti deildarinnar með 14 stig eftir tíu leiki, jafn mörg og Breiðablik í sætinu fyrir og fjórum stigum á undan næstu liðum fyrir neðan. Snæfell hefur þó leikið fleiri leiki.

Næst leikur Snæfell á sunnudaginn, 3. desember næstkomandi, þegar liðið mætir Fjölni í Stykkishólmi.

Snæfell hrifsaði til sín sigurinn