Snæfell vann góðan útisigur á Haukum, 68-77, þegar liðin mættust í Domino‘s deild kvenna í körfuknattleik í gærkvöldi. Snæfellskonur höfðu yfirhöndina bróðurpart leiksins en Haukar hleyptu þeim aldrei frá sér. Með yfirveguðum leik á lokasprettinum náði Snæfell hins vegar að sigla sigrinum heim.

Jafnræði var með liðunum í upphafi en Snæfell hafði heldur undirtökin. Haukar voru þó aldrei langt undan og minnkuðu muninn í 17-18 seint í upphafsfjórðungnum. Snæfell átti síðan lokaorðið í leikhlutanum og hafði sex stiga forystu að honum loknum, 19-25. Snæfell hafði yfirhöndina í öðrum leikhluta og tilraunir Hauka til að gera atlögu að forystunni báru engan árangur. Haukar gættu þess þó að missa Snæfell ekki of langt fram úr sér og sjö stigum munaði á liðunum í hléinu. Snæfell leiddi 29-36.

Snæfell var áfram sterkara í upphafi síðari hálfleik og komst ellefu stigum yfir snemma í þriðja leikhluta. Um miðjan leikhlutann náðu Haukar smá rispu og minnkuðu muninn í fjögur stig og Snæfell leiddi 51-55 fyrir lokafjórðunginn. Þar voru Snæfellskonur einfaldlega sterkari og yfirvegaðar í öllum sínum aðgerðum. Þær komust níu stigum yfir um miðjan fjórða leikhluta. Haukakonur reyndu að koma til baka og minnkuðu muninn í fimm stig en nær komust þær ekki. Snæfell steig ekki feilspor á lokasprettinum og sigraði að lokum með níu stigum, 68-77.

Kristen McCarthy átti stórleik fyrir Snæfell, skoraði 38 stig, tók 13 fráköst og gaf fimm stoðsendingar. Berglind Gunnarsdóttir skoraði 17 stig og tók sex fráköst.

Helena Sverrisdóttir var atkvæðamest í heimaliðinu með 20 stig, tólf fráköst og sjö stoðsendingar. Rósa Björk Pétursdóttir skoraði 16 stig og tók átta fráköst og Cherise Daniel var með 14 stig og sjö fráköst.

Snæfell nældi sér með sigrinum í áttunda stigið í vetur og situr sem stendur í sjöunda og næstneðsta sæti, tveimur stigum á eftir Breiðabliki í sætinu fyrir ofan. Næst leikur Snæfell gegn botnliði Njarðvíkur, sunnudaginn 3. desember næstkomandi. Sá leikur fer fram í Stykkishólmi.

Snæfell vann góðan sigur á Haukum