Skallagrímur tapaði naumlega fyrir Val, 79-82, þegar liðin mættust í Domino‘s deild kvenna í gærkvöldi. Leikurinn fór fram í Borgarnesi en það voru gestirnir sem höfðu undirtökin frá fyrstu mínútu.

Valsliðið byrjaði leikinn af miklum krafti og náði tíu stiga forskoti strax um miðjan upphafsfjórðunginn, 8-18. Það var þá sem Skallagrímskonur urðu fyrir áfalli þegar Sigrún Sjöfn Ámundadóttir meiddist illa og fór úr axlarlið. Búast má við því að hún verði frá keppni þangað til á nýja árinu. Gera þurfti hálftíma hlé á leiknum á meðan hlúð var að Sigrúnu áður en hægt var að koma henni undir læknishendur. Eftir að leikurinn hófst að nýju höfðu gestirnir áfram yfirhöndina og leiddu með níu stigum eftir fyrsta fjórðung, 14-23.

Skallagrímsliðið var ákveðið í upphafi annars fjórðungs og náði snarlega að minnka forskot Vals niður í þrjú stig. Jafnræði var með liðunum næstu mínútur en eftir því sem leið nær hálfleik jók Valur forskotið að nýju og það var 14 stig í hléinu, 31-45.

Skallagrímskonur minnkuðu muninn hægt og sígandi framan af öðrum leikhluta en Valskonur höfðu áfram yfirhöndina. Sex stigum munaði seint í þriðja en eftir það náði Valur góðri rispu og 14 stiga forskoti fyrir lokafjórðunginn, 49-63. Fjórði leikhluti var svipaður og sá þriðji, Valur hafði ágæta stjórn á leiknum þó Skallagrímur minnkaði muninn jafnt og þétt. Það vantaði herslumuninn hjá Skallagrímskonum því það var ekki fyrr en í blálokin að þær fóru að valda gestunum verulegum áhyggjum. Síðustu þrjár mínútur leiksins minnkuðu þær muninn úr tólf stigum og niður í þrjú en nær komust þær ekki. Valur sigraði með 82 stigum gegn 79.

Carmen Tyson-Thomas var atkvæðamest í liði Skallagríms. Hún átti stórleik, skoraði 34 stig, reif niður 18 fráköst og varði fimm skot. Jóhanna Björk Sveinsdóttir kom henni næst með 27 stig og ellefu fráköst en aðrar höfðu minna.

Stigaskorun dreifðist mun betur í liði gestanna þar sem sex leikmenn komust í tveggja stafa tölu á stigatöflunni, Alexandra Petersen þar stigahæst með 14 stig.

Skallagrímur situr eftir leikinn í fimmta sæti deildarinnar með 12 stig, jafn mörg og næstu þrjú lið fyrir ofan en Valur náði með sigrinum að lyfta sér í toppsætið með 14 stig. Næsti leikur Skallagríms er á laugardaginn, 2. desember næstkomandi, þegar liðið mætir Breiðabliki á útivelli.

Skallagrímur tapaði fyrir Val