Snæfell vann góðan sigur á Vestra, 111-94, þegar liðin mættust í níundu umferð 1. deildar karla í körfuknattleik i gær. Leikið var í Stykkishólmi og höfðu heimamenn heldur undirtökin þó leikurinn væri jafn og spennandi.

Snæfellingar byrjuðu leikinn af miklum krafti og léku vel fyrstu mínúturnar. Áræðni og þolinmæti einkenndi leik þeirra í upphafi. Þeir tóku góð skot, hittu vel og komust í 7-0. Þá vöknuðu gestirnir til lífsins og komu sér inn í leikinn. Um miðjan upphafsfjórðunginn höfðu þeir minnkað forystu Snæfells í tvö stig, 15-13. Eftir það höfðu heimamenn hins vegar undirtökin og með góðri rispu undir lok upphafsfjórðungsins náðu þeir tíu stiga forskoti, 35-25. Snæfellingar voru áfram við stjórnvölinn í öðrum leikhltua. Þeir hittu vel úr skotum sínum fyrir utan þriggja stiga línuna en gestirnir sóttu meira inn að körfunni og voru heimamönnum erfiðir viðureignar í teignum. Snæfell leiddi með ellefu stigum í hálfleik, 65-54.

Snæfell hélt forystunni eftir hléið en gestirnir tóku að sækja að þeim, hægt og sígandi, eftir því sem leið á þriðja leikhluta. Að honum loknum höfðu þeir minnkað muninn í fjögur stig, 85-81 og leikurinn galopinn fyrir lokafjórðunginn. Fjórði leikhluti var æsispennandi framan af. Vestramenn gerðu harða atlögu að Snæfelli, minnkuðu muninn í tvö stig og fylgdu þeim síðan eins og skugginn. Gestirnir misstu Nemanja Knazevic af velli með fimm villur þegar þrjár mínútur lifðu leiks og við það hrundi leikur Vestra. Snæfell tók öll völd á vellinum síðustu mínúturnar á meðan gestirnir náðu ekki að skora stig. Forysta Snæfells óx úr fjórum stigum í 17 þessar síðustu mínútur. Lokatölur urðu 111-94 fyrir Snæfell.

Christian Covile var atkvæðamestur Snæfellinga með 29 stig, ellefu fráköst, sjö stoðsendingar og sex stolna bolta. Sveinn Arnar Davíðsson var í miklu stuði sömuleiðis, skoraði 27 stig og tók sjö fráköst. Viktor Marinó Alexandersson skoraði 17 stig, Þorbergur Helgi Sæþórsson 15 og Nökkvi Már Nökkvason var með 12 stig.

Nemanja Knazevic átti stórleik fyrir gestina, skoraði 38 stig, reif niður 22 fráköst og var með sex varin skot. Nebosja Knazevic kom honum næstur með 31 stig og níu fráköst og Björn Ásgeir Ásgeirsson skoraði tíu stig.

Eftir leikinn hefur Snæfell tólf stig eftir níu leiki í þriðja sæti deildarinnar, tveimur stigum meira en næstu lið fyrir neðan en einum sigri á eftir Breiðabliki í sætinu fyrir ofan. Næst leikur Snæfell fimmtudaginn 30. nóvember næstkomandi þegar liðið mætir FSu á útivelli.

Snæfell lagði Vestra í jöfnum leik