Snæfell og Skallagrímur mættust í Vesturlandsslag Domino‘s deildar kvenna í körfuknattleik á laugardag. Leikurinn fór fram í Stykkishólmi en það voru gestirnir úr Borgarnesi sem höfðu betur, 56-67.

Snæfellskonur áttu mjög erfitt uppdráttar í upphafi leiks og skoruðu aðeins sex stig í fyrsta leikhluta. Þeim gekk illa að sækja og hittu ekki úr skotum sínum. Á sama tíma voru Skallagrímskonur mun sterkari í fráköstunum og miklu grimmari að sækja á körfuna. Fyrir vikið höfðu þær góða forystu eftir upphafsfjórðunginn, 6-20. Snæfell náði að minnka muninn í níu stig snemma í öðrum fjórðungi en Skallagrímskonur voru áram mun sterkara liðið á vellinum allt til hálfleiks. Þær sneru taflinu sér í vil og bættu við forskotið á meðan leikur Snæfells var fremur daufur. Skallagrímur hafði þægilega 18 stiga forystu í hálfleik, 20-38.

Skallagrímur byrjaði betur í síðari hálfleik en eftir því sem leið þriðja leikhluta fóru Snæfellskonur að minnka muninn jafnt og þétt. Tólf stigum munaði á liðunum fyrir lokafjórðunginn í stöðunni 40-52. Skallagrímskonur létu hins vegar ekki slá sig út af laginu og gættu þess að hleypa Snæfelli aldrei nær sér. Þær juku forskot sitt í 17 stig snemma í lokafjórðungnum og höfðu prýðilega stjórn á leiknum það sem eftir lifði. Snæfell gerði tilraun til áhlaups siðustu mínúturnar, minnkuðu muninn í sjö stig þegar um mínúta lifði leiks en komust ekki nær. Skallagrímskonur skoruðu síðustu stig leiksins og höfðu að lokum ellefu stiga sigur, 56-67.

Fyrsti leikhluti réði úrslitum

Snæfell náði aldrei að rétta úr kútnum eftir afleitan upphafsfjórðung. Liðið átti erfitt uppdráttar og hitti illa úr skotum sínum allan fyrri hálfleikinn. Hittnin batnaði ekki mikið í þeim síðari og því fór sem fór. Skallagrímsliðið átti engan stórleik en gerði nóg til að halda forystunni. Liðið brást alltaf við þegar á reyndi, hélt einbeitingu og stöðvaði allar tilraunir Snæfells til að komast inn í leikinn að nýju.

Carmen Tyson-Thomas var tvímælalaust besti leikmaður vallarins að þessu sinni. Hún skoraði 36 stig fyrir Skallagrím og reif niður 18 fráköst. Sigrún Sjöfn Ámundadóttir var með 15 stig og níu fráköst en aðrar höfðu minna í liði Borgnesinga.

Í liði Snæfells var Kristen McCarthy stigahæst með 22 stig og tók hún tíu fráköst að auki. Berglind Gunnarsdóttir skoraði 17 stig, tók átta fráköst og gaf fimm stoðsendingar og Rebekka Rán Karlsdóttir var með tíu stig.

Staðan liðanna í deildinni er þannig þegar níu umferðir hafa verið leiknar að Skallagrímur situr í þriðja sæti með tólf stig, rétt eins og liðin tvö fyrir ofan en tveimur stigum á undan næstu liðum. Snæfell er aftur á móti í sjöunda og næstneðsta sæti með sex stig, fjórum stigum á eftir næstu liðum en með gott forskot á lið Njarðvíkur sem er stigalaust á botninum.

Bæði liðin leika næst miðvikudaginn 29. nóvember næstkomandi. Snæfell mætir Haukum á útivelli en Skallagrímur tekur á móti Val.

Skallagrímur sigraði í fremur daufum Vesturlandsslag