Botnlið ÍA í tók á móti Fjölni 1. deild karla í körfuknattleik að kvöldi föstudags. Leikurinn var nokkuð kaflaskiptur og fjörugur en að endingu náðu Fjölnismenn tökum á leiknum og höfðu 13 stiga sigur, 86-99.

Mikið jafnræði var með liðunum í upphafi og þau skiptust á að leiða leikinn. Aldrei munaði meira en örfáum stigum á báða bóga, en eftir fyrsta leikhluta voru það Skagamenn sem höfðu forystuna, 27-24. Skagamenn héldu forystunni framan af öðrum leikhluta en gestirnir úr Grafarvogi fylgdu þeim eins og skugginn. Fjölnismenn náðu síðan að snúa leiknum sér í hag á síðari hluta annars leikhluta. Þeir komust yfir um miðjan fjórðunginn og með góðri rispu náðu þeir níu stiga forystu fyrir hléið, 51-60.

Skagamenn minnkuðu muninn í fjögur stig snemma í síðari hálfleik en gestirnir náðu að slíta sig aðeins frá þeim að nýju og höfðu ellefu stiga forskot um miðjan þriðja leikhluta. Eftir það náði ÍA aftur góðum leikkafla og minnkaði muninn í tvö stig en voru fjórum stigum á eftir fyrir lokafjórðunginn, 75-79. Gestirnir höfðu undirtökin í upphafi fjórða leikhlutans en Skagamenn voru ekki langt undan. Það var síðan um miðjan fjórðunginn sem Fjölnir náði góðum spretti og 15 stiga forskoti sem gerði út um leikinn. Fjölnir sigraði að lokum með 13 stgium, 86-99.

Marcus Dewberry var atkvæðamestur leikmanna ÍA með 31 stig en Ármann Örn Vilbergsson skoraði 17. Jón Orri Kristjánsson og Jón Frímannsson skoruðu tíu stig hvor en aðrir höfðu minna.

Samuel Prescott jr. var í algerum sérflokki í liði gestanna með 43 stig og ellefu fráköst. Sigvaldi Eggertsson var með 24 stig og sex fráköst og Rafn Kristján Kristjánsson skoraði 13 stig.

Skagamenn sitja enn stigalausir á botni deildarinnar eftir átta leiki, tveimur stigum á eftir FSu í sætinu fyrir ofan. Næst leikur ÍA föstudaginn 1. desember næstkomandi þegar liðið mætir Hamri í Hveragerði.

ÍA tapaði fyrir Fjölni í fjörugum leik