Skallagrímur vann öruggan heimasigur á FSu, 111-83, þegar liðin mættust í 1. deild karla í körfuknattleik í gærkvöldi. Hlutskipti liðanna í deildinni er ólíkt, Skallagrímur er á toppnum en FSu-menn í áttunda og næstneðsta sæti með aðeins einn sigurleik í farteskinu.

Fyrirfram bjuggust því flestir við sigri Skallagríms en það voru gestirnir sem náðu yfirhöndinni í fyrsta leikhluta eftir að liðin höfðu skipst á körfum í upphafi. Ekki fór mikið fyrir varnarleik Skallagríms og FSu náði fimm stiga forskoti um miðjan upphafsfjórðunginn. Þeir leiddu leikinn þar til í blálok leikhlutans að Skallagrímsmenn náðu með góðri rispu að komast yfir áður en flautan gall, 25-23. Jafnræði var með liðunum framan af öðrum fjórðungi en þá fóru Skallagrímsmenn að keyra upp hraðann og komust níu stigum yfir, 43-34. Gestirnir áttu lokaorðið í fyrri hálfleik og tókst að minnka muninn í fimm stig áður en flautað var til hálfleiks, 50-45.

FSu náði að minnka muninn í tvö stig í upphafi síðari hálfleiks en þá sögðu Skallagrímsmenn hingað og ekki lengra. Þeir keyrðu upp hraðann og stungu af. Með góðum leik náðu Borgnesingar 16 stiga forskoti fyrir lokafjórðunginn, 79-63. Það sem eftir lifði leiks voru Skallagrímsmenn grimmari og ákveðnari í öllum sínum aðgerðum. Þeir héldu áfram að keyra upp hraðann í leiknum og gestirnir náðu ekki að halda í við þá. Þegar lokaflautan gall var forysta Skallagríms orðin 28 stig. Þeir sigruðu með 111 stigum gegn 83.

Aaron Parks skoraði 26 stig í liði Skallagríms, tók átta fráköst og gaf sjö stoðsendingar. Eyjólfur Ásberg Halldórsson skoraði 18 stig, tók átta fráköst og gaf sjö stoðsendingar og Kristófer Gíslason var með 17 stig.

Ari Gylfason var atkvæðamestur gestanna með 29 stig, Charles Jett Speelman var með 17 stig og Florijan Jovanov var með 16 stig.

Skallagrímur trónir á toppi deildarinnar með 16 stig eftir fyrstu níu leiki vetrarins. Borgnesingar hafa tveggja stiga forskot á Breiðablik í sætinu fyrir neðan, en Blikar eiga þó leik til góða þegar þessi orð eru rituð.

Skallagrímur stakk af í síðari hálfleik