Skallagrímur sigraði Njarðvík 86-79, þegar liðin mættust í Domino‘s deild kvenna í körfuknattleik í gær. Leikið var í Borgarnesi og eftir jafnan fyrri hálfleik náði Skallagrímur undirtökunum í þriðja leikhluta og kláraði leikinn.

Bæði lið mættu ákveðin til leiks og jafnt var á með liðunum í upphafi. Varnarleikur liðanna var ekki upp á marga fiska í upphafi, liðin skiptust á að skora og gestirnir leiddu eftir fyrsta leikhluta, 20-25. Skallagrímskonur jöfnuðu metin á fyrri hluta annars leikhluta, 27-27 en eftir það átti Njarðvík góðan leikkafla og leiddi með sex stigum í hléinu, 34-40.

Skallagrímskonur sóttu að gestunum eftir hléið. Njarðvíkurliðið spyrnti við fótum en eftir að heimakonur jöfnuðu í 50-50 eftir miðjan þriðja leikhluta var ekki aftur snúið. Skallagrímskonur sneru taflinu sér í vil og leiddu með sjö stigum fyrir lokafjórðunginn, 59-52. Gestirnir gerðu smá áhlaup í upphafi fjórða leikhluta en Skallagrímur stóð það af sér. Minnst munaði tveimur stigum en eftir það keyrðu Skallagrímskonur forskot sitt hratt og örugglega upp í tíu stig. Gestirnir reyndu aftur að gera atlögu að forystu Skallagríms á lokamínútunum en höfðu ekki erindi sem erfiði. Skallagrímskonur héldu gestunum í skefjum og unnu að lokum sjö stiga sigur, 86-79.

Carmen Tyson-Thomas var óstöðvandi í liði Skallagríms. Hún skoraði 47 stig, tók 13 fráköst og gaf sex stoðsendingar. Sigrún Sjöfn Ámundadóttir var með 19 stig, tíu fráköst og sex stoðsendingar og Jóhanna Björk Sveinsdóttir skoraði tólf stig.

Shalonda Winton var atkvæðamest í liði gestanna með 35 stig og 17 fráköst en hún var eini leikmaður Njarðvíkur sem náði tveggja stafa tölu í stigaskorinu.

Skallagrímskonur sitja í fjórða sæti deildarinnar með tíu stig eftir átta leiki, jafn mörg og tvö lið fyrir ofan en tveimur stigum frá toppsætinu. Næst leikur Skallagrímur laugardaginn 25. nóvember næstkomandi þegar liðið mætir Snæfelli í Vesturlandsslag í Stykkishólmi.

Góður síðari hálfleikur skóp sigur Skallagríms