Snæfellskonur urðu að játa sig sigraðar gegn Keflavík, 100-91, þegar liðin mættust í Domino‘s deild kvenna í gærkvöldi. Leikið var suður með sjó. Snæfell mætti með aðeins sjö leikmenn til leiksins, en meiðsli hafa herjað á liðið undanfarið. María Björnsdóttir hefur til að mynda ekki geta leikið með liðinu síðan hún fékk höfuðhögg gegn Stjörnunni fyrir mánuði síðan. Nú síðast bættist Andrea Björt Ólafsdóttir við meiðslalistann. Hún er með slitin liðbönd og beinbjúg og mun því ekki leika með liðinu á næstunni.

En fáliðaðar Snæfellskonur gáfu Íslands- og bikarmeisturum Keflavíkur ekki tommu eftir í leiknum. Það var ekki fyrr en á lokamínútunum, þegar þreytan fór að gera vart við sig hjá Snæfellsliðinu, að Keflavík náði nokkurra stiga rispu sem nægði til sigurs.

Mikið jafnræði var með liðunum í upphafi leiks og Keflavík hafði þriggja stiga forystu eftir fyrsta leikhluta, 26-23 og áfram var leikurinn jafn og spennandi í öðrum fjórðungi. Keflavík náði smá rispu og átta stiga forskoti um miðjan annan leikhluta en Snæfell svaraði fyrir sig og minnkaði muninn í tvö stig áður en flautað var til hálfleiks. Keflavík leiddi í hléinu, 49-47.

Enn átti spennan eftir að aukast í síðari hálfleik. Snæfell komst yfir snemma í þriðja leikhluta áður en Keflavík tók forystuna að nýju. Hverri körfu var svarað og staðan var jöfn eftir þriðja leikhluta, 75-75 og leikurinn í járnum fyrir lokafjórðunginn.Snæfell skoraði fyrstu körfuna í fjórða leikhluta og hélt tveggja stiga forskoti fyrstu mínútur hans. Keflavík náði forystunni að nýju um miðjan fjórðunginn og leiddi með þremur stigum þegar þrjár mínútur lifðu leiks. Skömmu áður hafði Berglindi Gunnarsdóttur verið vikið af velli með sína fimmtu villu og það var ekki fyrr en þá að fámennið fór að segja til sín í liði Snæfells. Leikmenn voru þreyttir síðustu mínúturnar, hittu illa fyrir vikið og gerðu mistök á lokametrunum. Keflavík nýtti sér það og hafði að lokum níu stiga sigur, 100-91.

Kristen með 50 stig

Kristen McCarthy átti magnaðan leik fyrir Snæfell, skoraði 50 stig og tók sex fráköst. Er þetta í annað sinn í vetur sem hún skorar 50 stig eða meira í deildinni. Berglind Gunnarsdóttir var með 17 stig og átta fráköst og Anna Soffía Lárusdóttir skoraði tíu stig.

Brittany Dinkins var atkævðamest í liði Keflavíkur með myndarlega þrennu. Hún skoraði 35 stig, gaf 13 stoðsendingar og tók tólf fráköst. Thelma Dís Ágústsdóttir var með 27 stig, tólf fráköst og fimm stoðsendingar og Emelía Ósk Gunnarsdóttir skoraði 22 stig.

Eftir leikinn er Snæfell í sjöunda sæti deildarinnar með sex stig eftir átta leiki, tveimur stigum á eftir næstu liðum fyrir ofan en sex stigum fyrir ofan botnlið Njarðvíkur. Næst leikur Snæfell á laugardaginn, 25. nóvember næstkomandi þegar liðið mætir Skallagrími í Vesturlandsslag í Stykkishólmi.

Fáliðaðar Snæfellskonur gáfu ekki tommu eftir