Skallagrímur tók á móti Vestra í toppslag 1. deildar karla í körfuknattleik í gærkvöldi. Fyrir leikinn var Skallagrímur í öðru sæti en Vestri í því þriðja. Borgnesingar biðu leiksins með nokkurri eftirvæntingu því Aaron Parks, nýr erlendur leikmaður liðsins, lék þarna sinn fyrsta leik með Skallagrími. Leikurinn var fjörugur og spennandi en lauk að lokum með sigri Skallagríms, 106-96.

Vestramenn byrjuðu í svæðisvörn og gerðu skyttum Skallagríms erfitt fyrir í upphafi leiks. Borgnesingar höfðu þó heldur yfirhöndina fyrstu mínúturnar. En gestirnir gáfu ekkert eftir, voru öflugir undir körfunni og komust yfir seint í fyrsta leikhluta. Leikurinn var í járnum og gestirnir leiddu með aðeins einu stigi að loknum upphafsfjórðungnum, 22-23. Vestramenn voru mjög sterkir í öðrum leikhluta, komu boltanum inn að körfunni og snemma annars fjórðungs voru þeir komnir ellefu stigum yfir. Skallagrímsmenn reyndu að spyrna við fótum en varð lítt ágengt fyrr en líða tók nær hálfleik. Með góðum spretti síðsutu mínúturnar tókst þeim að minnka muninn í þrjú stig áður en hálfleiksflautan gall, 49-52.

Mikið jafnræði var með liðunum fyrst eftir hléið og hverri körfu var svarað. Það var síðan um miðjan þriðja leikhluta sem Skallagrímur náði yfirhöndinni í leiknum og tíu stiga forskoti fyrir lokafjórðunginn, 75-65. Skallagrímsmenn voru áfram sterkari í fjórða leikhluta og mikil stemning í liðinu. Mest náðu þeir 15 stiga forskoti um miðjan fjórðunginn en það sem eftir lifði leiks gættu þeir þess að gefa engin færi á sér og sigldu að lokum heim tíu stiga sigri, 106-96.

Eyjó með þrennu

Eyjólfur Ásberg Halldórsson var atkvæðamestur Skallagrímsmanna og setti upp huggulega þrennu. Hann skoraði 22 stig, tók 14 fráköst og gaf 10 stoðsendingar. Aaron Parks átti skínandi fínan leik í frumraun sinni með Borgarnesliðinu, skoraði 21 stig, tók 7 fráköst og gaf 8 stoðsendingar. Davíð Guðmundssno skoraði 20 stig og reynsluboltinn Darrel Flake skoraði 15 stig og tók 6 fráköst. Flake var einkar nægjusamur í leiknum, tók sex skot utan af velli og hitti úr þeim öllum.

Hinn reyndi Nebojsa Knezevic var yfirburðamaður í liði Vestra. Hann átti stórleik, skoraði 37 stig og tók 12 fráköst en næstur honum kom Ingimar Aron Baldursson með 17 stig.

Með sigrinum tylltu Skallagrímsmenn sér á topp deildarinnar með 14 stig eftir átta leiki, tveimur stigum á undan Breiðabliki þegar þessi orð eru rituð, en Blikar eiga þó leik til góða gegn Snæfelli á sunnudaginn.

Næsti leikur Skallagríms er hins vegar fimmtudaginn 23. nóvember næstkomandi þegar liðið tekur á móti FSu.

: Aaron Parks lék vel í sínum fyrsta leik fyrir Skallagrím.

: Darrell Flake var einkar nægjusamur í leiknum, hitti úr öllum sex skotum sínum utan af velli.

Skallagrímur sigraði Vestra í fjörugum leik